Banzembo 48

¹Nzembo ya bana ya Kore. Yawe azali monene mpe abongi na lokumu, kati na engumba ya Nzambe na biso, ngomba na Ye ya bule.

²Ezali kitoko, ngomba moke oyo esalaka esengo ya mokili mobimba, ngomba Siona ! Ngambo na yango ya Nor nde ezali engumba ya Mokonzi Monene.

³Nzambe azali kati na bandako na yango ya bokonzi, amimonisi lokola ndako batonga makasi.

⁴Pamba te bakonzi basanganaki, batambolaki nzela moko.

⁵Kasi tango kaka bamonaki yango, bakamwaki mpe bakimaki na somo.

⁶Mbala moko, bakomaki kolenga wana lokola mwasi oyo azali na pasi ya kobota

⁷to lokola mopepe ya Este oyo apanzaka masuwa ya Tarsisi.

⁸Ndenge kaka bayebisaki biso, ndenge mpe tomonaki kati na engumba ya Yawe, Mokonzi ya mampinga, kati na engumba ya Nzambe na biso ; Nzambe alendisaka yango seko na seko.

⁹Nzambe, kati na Tempelo na Yo, tokanisaka bolingo na Yo.

¹⁰Nzambe, lokumu na Yo epanzani kino na suka ya mokili, ndenge moko na Kombo na Yo ; loboko na Yo ya mobali etondi na bosembo.

¹¹Ngomba ya Siona ezali kosepela, bamboka ya Yuda etondi na esengo mpo na mikano na Yo.

¹²Botambola pembeni ya Siona, bokende zingazinga na yango, botanga bandako na yango ya milayi.

¹³Botala lopango na yango, botala malamu bandako na yango mpo ete bopesa sango epai ya bato oyo bakoya na sima.

¹⁴Pamba te Nzambe wana azali Nzambe na biso seko na seko mpe libela na libela ; akotambolisa biso, ezala kino na kufa.