Taalifi cant 38

¹Dib taalifu cant buy fàttalee, ñeel Daawuda. Éy Aji Sax ji, bul mer, di ma rëbb; bul xadaru, di ma mbugal.

²Aji Sax ji, fitt nga maa fitt, dóor nga ma.

³Danga maa mere, ma wéradi; maa bàkkaar, ba jagadi.

⁴Samay ñaawtéef mëdd ma, diisa diis, ba àttanuma ko.

⁵Maa defug ndof, ba am dana yu bédd, ba xasaw.

⁶Maa ngi sëgg, ne yàcc, ne yasar, di wéye tiis,

⁷yaram tàng, di bax, ma wéradi, ne làcc.

⁸Sama yaram dee goyy, ma ne lasar, jàq, di binni.

⁹Boroom bi, yaa ngi ne jàkk ci samay nammeel, samay onk umpu la.

¹⁰Sama fit a ngi tëf-tëfi, doole ŋiis, gët giim.

¹¹Samay dana tax xarit ak dëkkandoo di ma daw, mbokk dànd ma.

¹²Ñi may wuta rey a ngi may fiir, di ma jéema lor, di ma waxal musiba, yendu maa lalal pexe.

¹³Man, ma mel nib tëx, dégguma, mel ni luu, àdduwuma,

¹⁴di saf ku dul dégg, bay layoo.

¹⁵Aji Sax ji, yaw laa yaakaar; Boroom bi, sama Yàlla, yaa may nangul.

¹⁶Ma ne, ngalla buñu ma ree, di damoo samab jéll.

¹⁷Maa ngii di waaja daanu, dëkke mitit.

¹⁸Ma ne, aylayéwén def naa lu ñaaw, sama bàkkaar tiital na ma.

¹⁹Noon yaa ngi ne jonn ak seen doole, bare na ñu ma bañ ci neen.

²⁰Ma ji leen njekk, ñu fey ma njekkar; may sàkku lu baax, ñu di ma sikk.

²¹Éy Aji Sax ji sama Yàlla, bu ma wacc, bu ma sore.

²²Ngalla gaawe ma; Boroom bi, yaa may musal.