Faarfannaa 38

¹Faarfannaa Daawit. Yaadannoodhaaf. Yaa Waaqayyo, aarii keetiin na hin ifatin yookaan dheekkamsa keetiin na hin adabin.

²Xiyyooliin kee na waraananiiru; harki kees akka malee natti ulfaateera.

³Sababii dheekkamsa keetiitiif dhagni koo fayyaa dhabeera; sababii cubbuu kootiifis lafeen koo nagaa dhabeera.

⁴Cubbuun koo na liqimseeraatii; akkuma baʼaa baatamuu hin dandaʼamne tokkoottis natti ulfaateera.

⁵Sababii gowwummaa kootiitiif, madaan koo malaa naqate; ni ajaaʼes.

⁶Ani gad nan qabame; gadis nan cabe; guyyaa guutuus gaddaan oola.

⁷Dugdi koo na bobaʼa; dhagni koos fayyaa hin qabu.

⁸Ani laafeera; akka malees bututeera; garaan koo dhiphatee ani aadaan jira.

⁹Yaa Gooftaa, hawwiin koo hundinuu fuula kee duratti beekamaa dha; argansuun koo si duraa hin dhokatu.

¹⁰Lapheen koo ni dhaʼatti; jilbis na laafeera; ifni ija kootiis badeera.

¹¹Michoonni koo fi miiltoon koo sababii madaa kootiitiif narraa hiiqan; firoonni koos narraa fagaatanii dhadhaabatu.

¹²Warri lubbuu koo galaafachuu barbaadan kiyyoo naa kaaʼaniiru; warri na miidhuu barbaadanis waaʼee badiisa kootii dubbatu; guyyaa guutuus hammina natti yaadu.

¹³Ani garuu akkuma duudaa dhagaʼuu hin dandeenyee, akkuma arrab-didaa dubbachuu hin dandeenyeetii.

¹⁴Ani akka nama dhagaʼuu hin dandeenyee, akkuma nama afaan isaa deebii kennuu hin dandeenyees taʼeera.

¹⁵Yaa Waaqayyo, ani sin eeggadha; yaa Waaqayyo Gooftaa ko, ati deebii naa kennita.

¹⁶Ani, “Akka diinonni koo natti gammadan yookaan akka isaan yeroo miilli koo mucucaatutti natti of jajan hin eeyyamin” jedheeraatii.

¹⁷Ani kufuu gaʼeeraatii; dhukkubbiin koos takkumaa na hin dhiifne.

¹⁸Ani balleessaa koo nan himadha; sababii cubbuu kootiitiifis nan gadda.

¹⁹Warri akkasumaan diinota koo taʼan jajjaboo dha; warri sababii malee na jibbanis hedduu dha.

²⁰Warri qooda waan gaarii waan hamaa naa deebisan diinota koo ti; ani waan gaarii duukaa nan buʼaatii.

²¹Yaa Waaqayyo, ati na hin gatin; yaa Waaqa ko, narraa hin fagaatin.

²²Yaa Gooftaa, yaa fayyisaa ko, na gargaaruudhaaf ariifadhu!