Mapisarema 38

¹Pisarema raDhavhidhi. Chikumbiro. Haiwa Jehovha, musandirayira mukutsamwa kwenyu kana kundiranga muhasha dzenyu.

²Nokuti miseve yenyu yandibaya, uye ruoko rwenyu rwawira pamusoro pangu.

³Mumuviri mangu hamuchina utano nokuda kwehasha dzenyu; mapfupa angu apera simba nokuda kwechivi changu.

⁴Mhosva yangu yandiremera somutoro unorema kwazvo kuutakura.

⁵Maronda angu aora uye anosemesa nokuda kwoupenzi hwokutadza kwangu.

⁶Ndakotamiswa uye ndaderedzwa kwazvo; ndinofamba ndichichema zuva rose.

⁷Musana wangu wazara nokupisa kunorwadza; muviri wangu hauchina utano.

⁸Ndarukutika uye ndapwanyika chose; ndiri kugomera nokurwadza kwomwoyo.

⁹Haiwa Ishe, zvose zvandinoshuva zviri pachena pamberi penyu, kugomera kwangu hakuna kuvanzika kwamuri.

¹⁰Hana yangu inorova, simba rangu rapera; kunyange nechiedza chabva pameso angu.

¹¹Shamwari dzangu navafambidzani vondinzvenga nokuda kwamaronda angu; vavakidzani vangu vanogara kure neni.

¹²Avo vanotsvaka kundiuraya vanonditeya nemisungo yavo, avo vanoda kundikuvadza vanotaura nezvokuparadzwa kwangu; zuva rose vanorangana zvounyengeri.

¹³Ini ndafanana nematsi, isinganzwi, sembeveve, isingagoni kushamisa muromo wayo;

¹⁴ndava somunhu asinganzwi, ano muromo usingapinduri.

¹⁵Haiwa Jehovha, ndakakumirirai; muchapindura, imi Ishe Mwari wangu.

¹⁶Nokuti ndakati, “Musavarega vachifarira kutambudzika kwangu kana kuzvisimudzira pamusoro pangu, rutsoka rwangu parunotedzemuka.”

¹⁷Nokuti ndava pedyo nokuwa, uye kurwadziwa kwangu kunogara neni.

¹⁸Ndinoreurura chivi changu; chivi changu chinonditambudza.

¹⁹Vavengi vangu vane simba vazhinji; vanondivenga ndisina mhosva vakawanda.

²⁰Ivavo vanotsiva zvakanaka zvangu nezvakaipa, vanondireva pandinotevera zvakanaka.

²¹Haiwa Jehovha, regai kundisiya; regai kuva kure neni, imi Mwari wangu.

²²Haiwa Ishe Muponesi wangu, kurumidzai kuuya kuzondibatsira.