Taalifi cant 102

¹Di ñaani néew-ji-doole ju sonn, bay diis Aji Sax ji njàqareem. Éy Aji Sax ji, déglul, ma ñaan la; yal na sama yuux àgg fa yaw.

²Bu ma dummóoyu bésub njàqare; teewlu ma, gaawe ma sama bésub woote!

³Samay fan a ngi wéy ni saxaar, sama yax yi mel nib taal.

⁴Sama xol bi wow ni ñax mu xuur, ba lekk safatu ma.

⁵Damaa jàq, di onk a onk, ba desey yax.

⁶Ma mel nim tan ci màndiŋ mi, mbete looy cib gent.

⁷Nelaw të; ma mel ni picc mu wéetoo puju néeg.

⁸Bés bu ne noon yi di ma sewal; ñi may ñaawal di móoloo sama tur.

⁹Lekkuma xanaa di diwoob dóom, toroxloo; te lu ma naan, tuur ca rongooñ,

¹⁰te sa mer ak sa xadar a tax, nde yaa ma fab, xalab.

¹¹Ker a ngi law, nara mëdd samay fan. Maa ngi wowat nim ñax.

¹²Waaye yaw Aji Sax ji, yaay des ba fàww, saw tur saxal maasoo maas.

¹³Yaw yaay taxaw, ñeewante Siyoŋ, ndax baaxe ko jot na, àpp ba kay mat na.

¹⁴Sa jaam ñeeka sopp doji dëkk bii ñu màbb, ñoo ñeewante tojiti gentam bii.

¹⁵Na xeet yi wormaal turu Aji Sax ji, buuri àddina sépp wormaal darajaam,

¹⁶nde Aji Sax jeey tabaxaat Siyoŋ, nara feeñeg leeram.

¹⁷Mooy nangul aji tumurànke, xeebul ñaanam.

¹⁸Nañu bindal lii maasug ëllëg, ba xeet wu sosoogul màggal Ki Sax,

¹⁹nde Aji Sax jeey jéere fu sellam fa ca kaw, di niire suuf fa asamaan,

²⁰ngir teewlu onki ñi ñu tëj, nara ubbi ñi dee di seen àtte,

²¹ba ñu siiwal turu Aji Sax ji fi Siyoŋ, màggale ko fi Yerusalem,

²²kera ba xeet yiy bokk daje, ñook réew yi, ngir jaamu Aji Sax ji.

²³Sama digg doole la ma semmale, gàttal samaw fan.

²⁴Ma ne: «Éy sama Yàlla, maasoo maas, say at du jeex. Bu ma yóbboo sama diggi fan.

²⁵Bu yàgg nga samp suuf, sàkke asamaan say loxo.

²⁶Yooyu day réer, waaye yaw yaay sax, lépp ay ràpp ni mbubb, nga soppi leen niy yére, sànni;

²⁷te yaw ngay kenn ki, te say at amul kem.

²⁸Sa doomi jaam ñeey dëkk; seen askan sax fi sa kanam.»