Ayóoba 40

¹Aji Sax ji dellu ne Ayóoba:

²Yaw miy layook Aji Man ji, dangay diiŋat? Yaw miy weranteek Yàlla, doo tontu?

³Ayóoba àddu ne Aji Sax ji:

⁴Man mi tekkiwul dara, nu ma lay tontoo? Sama loxo laa ube sama gémmiñ.

⁵Maa waxoon benn yoon, waxatuma; maa tóllanti woon, dootul am.

⁶Aji Sax ji daldi àddoo fa ngëlén la, ne Ayóoba:

⁷Takkul boog te góor-góorlu, ma laaj la, nga xamal ma.

⁸Sañ nga maa teg tooñ daal, di ma sikkal, ba am dëgg?

⁹Dangaa am dooley Yàlla, mbaa kàddu guy dënu ni gosam?

¹⁰Ràngool boog màggaay ak teraanga, te làmboo dayook daraja.

¹¹Yuril sa mer, te xool képp ku bew, detteel ko,

¹²xoolal képp ku bew, toroxal ko, te dëggaate ku bon fa mu taxaw.

¹³Boole leen làq biir suuf, tëjleen ràpp fu làqu fa,

¹⁴Kon déy man maa lay sargal, muy ndam lu la sa doole may.

¹⁵Beyemot rab wu réy waa ngii, maa ko sàkk, sàkk la, ñax lay lekk niw nag.

¹⁶Doole jaa ngoogu ca ndigg la, kàttan ga laloo suuxi biir ba,

¹⁷geen ga ne kàdd ni garabu seedar, sidditi lupp ya ñabaloo,

¹⁸yax ya di ponki xànjar, cér ya mel ni yeti weñ.

¹⁹Moo gëna yéeme ci li Yàlla sàkk, te ki ko sàkk doŋŋ a koy boccil saamar.

²⁰Xontam déy tund yee ko yor, rabi àll yépp di fowe fa wetam.

²¹Keppaaru déem lay goore, làqoo barax ak ban,

²²déem ya keral ko, garabi tàkk ga yéew ko.

²³Dex gu fees jaaxalu ko, gannaxi dexu Yurdan di ko talaata, mu ne tekk.

²⁴Ana ku koy jàpp te muy xoole? Ak ku koy nos, ba téye ko?