Hopa 40

¹I kōrero mai anō a Ihowā ki a Hopa, i mea:

²“E tohe ana rānei ki te Kaha Rawa te tangata whakatohutohu? Mā te tangata e whakatūpehupehu ana ki te Atua, māna e kōrero mai.”

³Anō rā ko Hopa ki a Ihowā, i mea ia:

⁴“Nanā, ehara noa iho ahau; ko te aha tāku e whakahoki atu ai ki a koe? Ka kōpania tōku ringa ki tōku māngai.

⁵Kua kotahi tāku kōrerotanga, ā, e kore ahau e whakahoki kupu atu; ā, tuarua rawa, otirā kāhore atu āku.”

⁶Kātahi ka whakahokia mai e Ihowā ki a Hopa i roto i te tūkauati, ka mea:

⁷“Tēnā rā, whakatāne, whītikiria tōu hope, ā, ka ui atu ahau ki a koe, māu anō e whakaatu mai ki ahau.

⁸Me whakakāhore anō rānei e koe tāku whakawā? Me whakahē ki ahau kia whakatikaia ai tāu?

⁹He ringa pērā rānei tōu i tō te Atua? He reo whatitiri rānei tōu, he pērā i tōna?

¹⁰“Tēnā rā, rākai i a koe ināianei ki te rangatiratanga, ki te korōria; tātai i a koe ki te hōnore, ki te mana.

¹¹Ringihia atu te puhaketanga o tōu riri; tirohia atu ngā mea whakakake katoa, whakaititia iho.

¹²Titiro atu ki ngā mea whakakake katoa, whakapikoa iho; takahia iho anō hoki te hunga kino i te wāhi e tū nā rātou.

¹³Huihuia atu rātou, hunā ki te puehu, herea ō rātou mata ki te wāhi ngaro.

¹⁴Nā, ko reira ahau whakaae ai ki a koe, mā tōu ringa matau anō koe e whakaora.

¹⁵“Nā, whakaaroa a Pehemoto, he mea hanga ngātahi kōrua nāku; e kai rā i te tarutaru, ānō he kau.

¹⁶Nanā, ko tōna kaha kei tōna hope, ko tōna pakaritanga kei ngā uaua o tōna kōpū.

¹⁷Ko tōna hiawero, ānō he hīta e tāwhiria ana e ia; pōwhiwhiwhi tonu ngā uaua o tōna hūhā.

¹⁸Ko ōna wheua, ānō he kōrere parāhi; ko ōna rara, he poro rino.

¹⁹“Ko ia te tino mea nui o ngā ara o te Atua – ko tōna kaihanga anake hei whakapā i tāna hoari ki a ia.

²⁰He pono ko ngā maunga hei hōmai kai māna; kei reira anō e tākaro ana ngā kīrehe katoa o te pārae.

²¹Ko tōna takotoranga ko raro i ngā rākau kōuru nui, i te rake kākaho, i te repo.

²²Hei taupoki mōna te whakamarumaru o ngā rākau kōuru nui, kei tētahi taha ōna, kei tētahi taha, ngā wirou o te awa.

²³Nanā, ki te āki mai te waipuke, e kore ia e tūiri; ū tonu tōna whakaaro, ahakoa kōkiri noa mai a Horano ki tōna māngai.

²⁴E hopukia rānei ia e tētahi i a ia e mataara ana, e poka rānei i tōna ihu ki te rore, puta noa?