Banzembo 89

¹Maloba ya Etani, moto ya Ezera. Nakoyemba tango nyonso bolingo ya Yawe ; monoko na ngai ekosakola boyengebene na Yo libela na libela.

²Solo, nazali kotatola yango : « Miboko ya bolingo na Yo ezali na suka te ; ovandisi boyengebene na Yo kati na likolo. »

³Olobaki : « Nasali boyokani elongo na moponami na ngai, nalapi ndayi epai ya mosali na ngai, Davidi :

⁴‹ Nakokomisa yo libota ya bokonzi mpo na tango nyonso mpe nakolendisa kiti na yo ya bokonzi mpo na seko. › »

⁵Yawe, Lola esanzolaka misala na Yo ya kokamwa mpe bosembo na Yo kati na lisanga ya basantu.

⁶Nani akokani na Yawe kuna na likolo ? Nani akokani na Yawe kati na mampinga ya likolo ?

⁷Azali Nzambe ya somo kati na lisanga ya basantu ; solo, azali somo koleka ba-oyo nyonso bazingeli Ye.

⁸Yawe, Nzambe-Na-Nguya-Nyonso, nani azali na nguya lokola Yo ? Nani, oh Yawe ? Boyengebene na Yo ezingeli Yo.

⁹Yo nde okonzaka lolendo ya ebale monene mpe okitisaka bambonge na yango soki etomboki.

¹⁰Yo nde olongaki Rahavi, dalagona ya Ejipito, kino koboma ye ; mpe, na nguya na Yo, opanzaki banguna na Yo.

¹¹Likolo ezali ya Yo ; mabele mpe ezali ya Yo ! Yo nde osala mokili mpe nyonso oyo ezali kati na yango.

¹²Yo nde okela Nor mpe Sude ; Tabori mpe Erimoni egangaka na esengo mpo na lokumu ya Kombo na Yo.

¹³Loboko na Yo ezali na makasi, loboko na Yo ezali na nguya, loboko na Yo ya mobali oyo otombola.

¹⁴Bosembo mpe alima ezali miboko ya Kiti ya Bokonzi na Yo, boyengebene mpe bolingo etambolaka liboso na Yo.

¹⁵Esengo na bato oyo bayebi kobetela Yo maboko ! Yawe, batambolaka na pole ya elongi na Yo,

¹⁶basepelaka mikolo nyonso na Kombo na Yo, basanzolaka bosembo na Yo.

¹⁷Pamba te ozali nkembo mpe nguya na bango ; mpe olongisaka biso na ngolu na Yo.

¹⁸Yawe azali nguba na biso ; Mosantu ya Isalaele azali Mokonzi na biso.

¹⁹Mokolo moko, olobaki na bayengebene na Yo kati na emoniseli : « Nasungaki elombe moko ya bitumba, natombolaki elenge mobali moko kati na bato na ngai ;

²⁰namonaki Davidi, mosali na ngai ; napakolaki ye mafuta na ngai ya bule.

²¹Nakobatela ye na loboko na ngai ya nguya, mpe loboko na ngai ekokomisa ye makasi.

²²Monguna akobimela ye ata moke te na pwasa, moto mabe akokoka konyokola ye te.

²³Nakobebisa banguna na ye liboso na ye mpe nakoboma bayini na ye.

²⁴Bolingo mpe boyengebene na ngai ekozala elongo na ye ; mpe na Kombo na Ngai, akotombola elongi.

²⁵Nakotia ebale monene na se ya loboko na ye, mpe bibale, na se ya loboko na ye ya mobali.

²⁶Akobelela ngai boye : ‹ Ozali Tata na ngai, Nzambe na ngai, Libanga mpe Mobikisi na ngai ! ›

²⁷Mpe ngai, nakokomisa ye mwana na ngai ya liboso, mokonzi oyo aleki na kotombwama kati na bakonzi ya mokili.

²⁸Nakobatela mpo na seko bolingo na ngai mpo na ye ; boyokani na ngai elongo na ye ekotikala kobeba te.

²⁹Nakobatela mpo na libela libota na ye ya bokonzi, mpe kiti na ye ya bokonzi ekowumela ndenge moko na likolo.

³⁰Soki bana na ye basundoli mibeko na ngai mpe balandi bosembo na ngai te,

³¹soki babuki mitindo na ngai mpe babateli te mibeko na ngai,

³²nakopesa bango etumbu na nzela ya lingenda, mpo na botomboki na bango, mpe na nzela ya makofi, mpo na masumu na bango ;

³³kasi nakowangana te bolingo na ngai mpe nakobongola te boyengebene na ngai.

³⁴Nakosambwisa te boyokani na ngai mpe nakobongola te maloba na ngai.

³⁵Nalapaki yango na ndayi mbala moko mpo na libela na Kombo ya bosantu na ngai : ‹ Nakokosa Davidi te ! ›

³⁶Libota na ye ya bokonzi ekowumela mpo na libela, mpe kiti na ye ya bokonzi ekowumela lokola moyi liboso na ngai.

³⁷Solo, lokola sanza, ekowumela na bokonzi mpo na libela. Motatoli oyo azali kuna kati na likolo akoki kokosa te. »

³⁸Nzokande, obwakaki, omonaki pamba, osilikelaki mopakolami na Yo !

³⁹Owanganaki boyokani oyo osalaki elongo na mosali na Yo, obwakaki na mabele mpe osambwisaki motole na ye.

⁴⁰Otobolaki madusu kati na bamir na ye nyonso mpe obukaki bandako na ye, oyo batonga makasi ;

⁴¹bato nyonso oyo balekaki wana babotolaki ye biloko, mpe bavandi ya pembeni na ye bakomaki kotiola ye.

⁴²Obakisaki makasi ya bayini na ye mpe otondisaki banguna na ye nyonso na esengo,

⁴³osalaki kutu ete mopanga na ye ebalukela ye moko mpe osungaki ye te na bitumba ;

⁴⁴osilisaki kongenga ya lokumu na ye, obwakaki kiti na ye ya bokonzi na mabele ;

⁴⁵okomisaki moke mikolo ya bolenge na ye mpe olatisaki ye kazaka ya soni.

⁴⁶Yawe, kino tango nini ? Okomibomba penza tango nyonso ? Kino tango nini kanda na Yo ekongala lokola moto ?

⁴⁷Kanisa motango ya mikolo ya bomoi na ngai ! Okelaki penza bato mpo na suka oyo ezanga ata tina !

⁴⁸Moto nani akoki kozala na bomoi mpe azanga komona kufa ? Nani akolonga kokima nguya ya mboka ya bakufi ?

⁴⁹Nkolo, wapi bolingo na Yo ya kala oyo alakaki Davidi na boyengebene na Yo na nzela ya ndayi ?

⁵⁰Nkolo, kanisa ndenge bazali kosakanela basali na Yo ; kobosana te ete namemi mokumba ya bato oyo nyonso !

⁵¹Yawe, kanisa mafinga ya banguna na Yo, oyo batiolaka bomoi ya mopakolami na Yo !

⁵²Tika ete Yawe apambolama libela na libela ! Amen ! Amen !