Waiata 88

¹He waiata, he hīmene mā ngā tama a Koraha. Ki te tino kaiwhakatangi: Maharata Reanoto. He Makiri nā Hemana Eterahi. E Ihowā, e te Atua o tōku whakaoranga, he tangi tāku ki tōu aroaro i te ao, i te pō,

²kia tae atu tāku īnoi ki tōu aroaro; whakatītahatia mai tōu taringa ki tāku tangi.

³Kua kī hoki tōku wairua i te pōuri, ā, e whakatata ana tōku ora ki te rēinga.

⁴Kua taua tahitia ahau me te hunga e heke ana ki te rua; e rite ana ahau ki te tangata kāhore ōna āwhina!

⁵I makā ki waenga i ngā tūpāpaku, me he tangata i patua e takoto ana i te urupā, kāhore nei e maharatia e koe i muri; he mea momotu kē rātou nā tōu ringa.

⁶Kua whakatakotoria ahau e koe ki te rua i raro riro, ki te pōuri, ki ngā rire.

⁷E pēhia ana ahau e tōu riri, e pākia ana hoki e koe ki āu ngaru katoa. Hera

⁸Kua whakamataratia atu e koe ōku hoa kia tawhiti i ahau; kua meinga ahau e koe hei mea whakarihariha ki a rātou; kua uakina mai ahau, ā, kāhore e puta ki waho;

⁹kua hē tōku kanohi i te tangihanga. E karanga ana ahau ki a koe, e Ihowā, i ngā rā katoa, kua totoro hoki ōku ringa ki a koe.

¹⁰Tērā rānei koe e mahi merekara ki ngā tūpāpaku? E ara koia te hunga kua mate ki te whakamoemiti ki a koe? Hera

¹¹Ka kauwhautia rānei tōu aroha i roto i te urupā? Tōu pono i roto i te ngaromanga?

¹²E mātauria koia āu mea whakamīharo i roto i te pōuri, tōu tika i te whenua o te warewaretanga?

¹³Ko ahau ia kua karanga ki a koe, e Ihowā; ā, i te ata ka tae atu tāku īnoi ki tōu aroaro.

¹⁴He aha, e Ihowā, i pangā ai tōku wairua e koe? He aha i huna ai tōu mata ki ahau?

¹⁵Nō tōku tamarikitanga ake anō i pākia ai ahau, i whakahemohemo ai; i ahau e pēhia ana e āu whakawehi, ka pororaru noa iho.

¹⁶I tika tōu riri nui mā runga i ahau; kua haukotia ahau e āu mea whakawehi.

¹⁷Ānō he wai rātou ki te karapoti i ahau i te rā roa nei; hui tahi rātou ki te taiāwhio i ahau.

¹⁸Kua wehea e koe kia tawhiti atu i ahau te hoa hei aroha mai, me ōku hoa ki roto ki te pōuri.