Waiata 47

¹Ki te tino kaiwhakatangi. He hīmene mā ngā tama a Koraha. Pākia ō koutou ringa, e ngā iwi katoa; hāmama ki te Atua, kia hari te reo.

²Nō te mea he wehi a Ihowā, te Runga Rawa, he kīngi nui ia nō te whenua katoa.

³Māna e riro ai ngā iwi ki raro i a tātou, me ngā tautāngata ki raro ki ō tātou waewae.

⁴Māna e whiriwhiri tō tātou nohoanga mō tātou, te mea pai rawa o Hākopa, o tāna i aroha ai. Hera

⁵Kua kake atu te Atua i roto i te hāmama, a Ihowā i roto i te tangi o te tētere.

⁶Hīmene ki te Atua, hīmene atu; hīmene ki tō tātou Kīngi, hīmene atu.

⁷Ko te Atua hoki te Kīngi o te whenua katoa; hīmene atu i runga i te mōhio.

⁸Ko te Atua te Kīngi o ngā tauiwi; e noho ana te Atua i runga i te torōna o tōna tapu.

⁹Kua huihui ngā rangatira o ngā iwi, hei iwi mō te Atua o Āperahama. Nā te Atua hoki ngā whakangungu rākau o te whenua; kua whakanuia rawatia ia.