1Ki te tino kaiwhakatangi. He hīmene nā Rāwiri. E Ihowā, ko koe tāku e whakawhirinaki nei; kei whakamā ahau ake ake; whakaorangia ahau, he tika nei hoki koe.
2Anga mai tōu taringa ki ahau; hohoro te whakaora i ahau. Kia ai koe hei kōhatu kaha mōku, hei whare tiaki mōku.
3Ko koe hoki tōku kōhatu, tōku pā; nā, kia mahara ki tōu ingoa, ā, ārahina ahau, tohutohungia hoki ahau.
4Kapohia ahau i roto i te kupenga i hunā e rātou mōku; ko koe hoki tōku kaha.
5Tēnei tōku wairua te tukua atu nei e ahau ki tōu ringa; nāu ahau i hoko e Ihowā, e te Atua o te pono.
6E kino ana ahau ki te hunga e whakaaro ana ki ngā mea tekateka noa; e whakawhirinaki ana hoki ahau ki a Ihowā.
7Ka whakamanamana ahau, ka hari ki tōu atawhai; mōu i titiro ki tāku tangi; i mātau hoki ki tōku wairua i ngā wā o te hē;
8kāhore ahau i kopia e koe ki roto ki te ringa o te hoariri; kua whakatūria e koe ōku waewae ki te wāhi nui.
9Tohungia ahau, e Ihowā, kei te hē hoki ahau, pakoko kau tōku mata i te pōuri, tōku wairua me tōku kōpū.
10Ka hemo nei hoki tōku ora i te tangi, me ōku tau i te auē; poto iho tōku kaha i tōku hē, kurupopo ana ōku iwi.
11He tāwainga ahau nā ōku hoariri katoa; ko te tino mahi ia tēnā a ōku hoa noho tata, he mea wehi ahau nā ngā tāngata i mōhio ki ahau; ko te hunga i kite i ahau i waho, rere ana i ahau.
12Kua warewaretia ahau me te tūpāpaku kua ngaro atu i te ngākau; kua rite ki te oko pakaru.
13I rongo hoki ahau i te ngautuarā a te tini; i karapotia ahau e te wehi; i a rātou e rūnanga ana ki te hē mōku, i mea kia whakamatea ahau.
14Ko ahau ia i whakawhirinaki ki a koe, e Ihowā; i mea, “Ko koe tōku Atua.”
15Kei tōu ringa ōku tāima, whakaorangia ahau i ngā ringa o ōku hoariri, i te hunga e tūkino ana i ahau.
16Kia whiti tōu mata ki tāu pononga; whakaorangia ahau, he mahi tohu hoki tāu.
17Kei whakamā ahau, e Ihowā; kua karanga hoki ahau ki a koe; kia whakamā te hunga kino, kia takoto puku i te rēinga.
18Whakamutua te kōrero a ngā ngutu teka, he kino nei ā rātou kōrero mō te tangata tika, nā tō rātou whakapehapeha hoki, nā tō rātou whakahīhī.
19Anō te nui o tāu pai kua rongoātia nei e koe mō te hunga e wehi ana ki a koe; i mahia nei e koe mō te hunga e whakawhirinaki ana ki a koe i te aroaro o ngā tama a te tangata!
20Ka hunā rātou e koe ki te wāhi ngaro i tōu aroaro i ngā rauhanga a te tangata; ka hunā rātou e koe ki roto ki te tēneti, kei taea e te ngangau a ngā arero.
21Kia whakapaingia a Ihowā, mōna i mea kia mīharotia tāna mahi tohu ki ahau i te pā kaha.
22I kī hoki ahau i tōku pōtatutatunga, “Kua motuhia mai ahau i mua i ōu kanohi.” Ahakoa rā i rongo koe ki tōku reo īnoi i tāku karangatanga ki a koe.
23Arohaina a Ihowā, e tāna hunga tapu katoa; e tiakina ana e Ihowā te hunga pono, ā, he nui tāna utu ki te kaimahi whakapehapeha.
24Kia māia, kia kaha ō koutou ngākau, e te hunga katoa e tūmanako ana ki a Ihowā.