Taalifi cant 18

¹Mu jëm ci njiital woykat yi, ñeel Daawuda jaamub Aji Sax ji. Mu jagleel Aji Sax ji woy wii, bés ba mu ko xettalee ci mboolemi noonam, xettali ko it ci Buur Sawul. Kàdduy woy wa lii la. Mu ne: Aji Sax ji, maa la sopp, yaw mi may dooleel.

²Aji Sax ji mooy sama cëslaay, moo may aar, di ma wallu. Yàllaay sama cëslaay li ma yiiroo, fegu; mooy Boroom doole ji may musal, di ma làq.

³Ki yelloo cant, Aji Sax ji, moom laa woo, mucc ci samay noon.

⁴Buumi dee tanc ma, walum kasara naq ma,

⁵buumi njaniiw laaw ma, dee ne jaas, di ma fiir.

⁶Ma jàq, woo Aji Sax ji, ne sama Yàlla wallóoy, mu dégge këram. Ma yuuxu, muy dégg.

⁷Mu mer, suuf yëngu, di ker-keri; reeni tund ya jaayu, di reg-regi.

⁸Saxaar di sël-sëlee ca wakkan ya, sawara boye ca gémmiñ ga, xal yu yànj tàkke ca.

⁹Mu firi asamaan, wàcc, niir yu fatt lal tànk ya.

¹⁰Ma nga war malaakam serub, di naaw, daayaarloo laafi ngelaw.

¹¹Ma nga bàddoo lëndëm, làqoo, làmboo ndox mu lëndëm aki xàmbaar,

¹²leer a ko jiitu, xàmbaar ya topp ca, ak tawub yuur ak xali sawara.

¹³Aji Sax jee dënoo asamaan. Aji Kawe jee àddu, muy tawub yuur ak xali sawara,

¹⁴mu soqiy fitt ak jumi melax, tasaare leen, fëlxe.

¹⁵Aji Sax ji, dangaa gëdd, nokki, mu riir, xuri géej ne fàŋŋ, ron suuf ne duŋŋ.

¹⁶Aji Sax jee yóotoo fa kaw, jàpp ma, seppee ma ca xóotey ndox ma,

¹⁷musal ma ca noon yu mag ya ma bañ te man ma.

¹⁸Ñu dajeek man, bés ba ma jàqee, Aji Sax ji taxawu ma,

¹⁹yaatal ma, bége ma, ba xettali ma.

²⁰Aji Sax jee ma yool sama njub, samay loxoo set, mu fey ma.

²¹Sàmm naa yooni Aji Sax ji, bonuma, di moy sama Yàlla.

²²Dama ne jàkk ndigalam yépp, dëdduwuma dogali yoonam.

²³Seede na, may jëfeg mat, di moyoo tooñ.

²⁴Aji Sax jee ma yool sama njub, rafetlu sama mucc ayib.

²⁵Yaw Aji Sax ji, ku gore, fekk la gore; ku matale, fekk la matale;

²⁶ku sellal, fekk la sell; ku dëng, fekk laak say feem.

²⁷Yaw yaay musal xeet wu néew doole, kuy daŋŋiiral, nga detteel.

²⁸Yaw kay yaa may niital. Aji Sax ji sama Yàllaay leeral sama lëndëm.

²⁹Maak yaw kay, ma song gàngoor. Maak sama Yàlla, ma tëbum tata.

³⁰Yàllaa mat. Kàddug Aji Sax jee wér te wóor. Mooy feg képp ku ko làqoo.

³¹Ana kuy Yàlla ku moy Aji Sax ji? Ana ku mat cëslaay ku dul sunu Yàlla?

³²Yàllaa may dooleel, di ma xàllal, yoon mat.

³³Moo ma gaawal ni kéwél, taxawal ma fu kawe.

³⁴Moo may tàggat ci xare, may tàwwig fitt ci xalag xànjar.

³⁵Aji Sax ji yaa may feg, musal ma, dooleel ma sa loxo, nangul ma, darajaal ma.

³⁶Yaa ma xàllalu yoon, ba duma tërëf.

³⁷Ma dàq noon yi, dab leen, jekkali, doora dëpp.

³⁸Ma jam leen, jógatuñu, xanaa fëlëñu, ma joggi.

³⁹Sol nga ma dooley xare, sukkal ñi ma jógal, ñu féete ma suuf.

⁴⁰Won nga ma ndoddi noon, ma boole bóom bañ yi.

⁴¹Ñu ne wallóoy, wall amul; ñu woo Aji Sax ji, faalewu leen.

⁴²Ma wol, ba ñu doon pënd, ngelaw wal, ma wetti ni banu mbedd.

⁴³Xettali nga ma ci bokk yiy fippu, def ma, ma jiite ay xeet; waaso wu ma xamul sax nangul ma,

⁴⁴ku ma ci dégg, déggal ma, ay doomi doxandéem di ma raamal,

⁴⁵ne yàcc, génne seeni tata, di lox.

⁴⁶Aji Sax jeey kiy dund. Kii ma sësoo jara sant. Yàlla mi may musal moo màgg!

⁴⁷Mooy Yàlla ji ma feyul, nangulal ma xeet yi.

⁴⁸Xettali nga maak noon, kaweel ma, ma tiim ku ma jógal, xettaleeti ma cib soxor.

⁴⁹Kon Aji Sax ji, ma sant la ci biir xeet yi, ma kañ sa tur!

⁵⁰Yaay may sa buuru ñoñ ndam lu réy, yaay ji ngor ki nga fal, muy man Daawuda, di sama askan ba fàww.