Ngën-gi-woy 7

¹Janqoo, lingeer sama, sa tànk yee ka jekk ci sa dàll yi, sa mooco yi mërgalu niy jaaro yu ndaanaanu tëgg yatte loxoom.

²Sa jumbax bi di kaas bu mërgalu, yàlla bumu ñàkk biiñu njafaan! Sa biir bi di jalu pepp mu ay tóor-tóor ñag.

³Sa ween yi ni ñaari tef, mbaa seexi kéwél.

⁴Sa loos wi, coleet, rattax, ni tatay bëñi ñey; say gët di lerxat ni déegi Esbon ya feggook buntu Bat Rabim. Sa bakkan bi jub xocc ni tatay Libaŋ ja tiim Damaas.

⁵Sa bopp siggi ni tundu Karmel, njañ liy nes-nesi ni sooyu buur, létt yay fëy-fëyi, ba laaw buur.

⁶Rafet, sopploo! Soppee, bànneex nga!

⁷Sa taxawaay bii garabu tàndarma la, sa ween yi di cëggi doom ya.

⁸Ma ne, maay yéeg tàndarma gi, ŋëb doom yi. Yal na say ween di sama cëggi reseñ, sag noo jox ma doom yu xeeñ,

⁹sa gémmiñ di xelli ngëneelu biiñ. Na walal sama nijaay, tuurul ñiy nelaw.

¹⁰Man, nijaay a moom, te maay nammeelam.

¹¹Nijaay, ayca nu dem tool ba, fanaani ca tóor-tóori fuddën ya.

¹²Nan teela xëyi ca tóokëri reseñ ya, bu reseñ ji jebbee, mbaa tóor-tóor yi focci, mbaa gërënaat ji tóor, nu gis. Fa laa lay jébbale mbëggeel.

¹³Tóor-tóor yu xeeñ yaa ngi gilli, lépp luy doom yu neex aje sunu bunt néeg, yu yees yaak ya woon, ma boole dencal la, nijaay.