Waiata 83

¹He waiata, he hīmene, nā Āhapa. E te Atua, kei wahangū koe, kei whakarongo puku, kei āta noho, e te Atua.

²He mea hoki, tēnei ōu hoariri te ngangau nei, ā, kua ara ngā mātenga o te hunga e kino ana ki a koe.

³Kua āta ngārahu rātou ki tāu iwi, e whakatakoto kōrero ana hoki rātou mō āu mea huna.

⁴Kua mea nei rātou, “Tēnā, tātou ka huna i a rātou, kia kore ai tēnā iwi; kia kaua ai hoki e maharatia te ingoa o Īharaira ā muri ake nei.”

⁵Kua kotahi tō rātou ngākau i a rātou e rūnanga ana; kua whakatakoto rātou he tikanga kino ki a koe –

⁶ko ngā tēneti o Ēroma, o ngā Ihimaeri, o Moapa, o ngā Hakarini,

⁷a Kepara, a Āmona, a Amareke, ngā Pirihitini, me ngā tāngata o Tāira.

⁸Kua uru hoki a Ahiria ki roto ki a rātou; kua āwhinatia e rātou ngā tamariki a Rota. Hera

⁹Pērātia rātou me Miriana; me Hihera, me Iapini, i te awa i Kihona;

¹⁰i mate nei ki Eneroro, i waiho nei hei whakawairākau mō te whenua.

¹¹Kia rite ō rātou rangatira ki a Orepe rāua ko Teepe, āe, ō rātou ariki katoa hoki ki a Tepa rāua ko Taramuna;

¹²mō rātou i mea, “Tātou ka tango i ngā kāinga o te Atua mō tātou.”

¹³E tōku Atua, meinga rātou kia rite ki te āwhiowhio puehu, ki te pāpapa e pūhia ana e te hau.

¹⁴Kia rite ki te ahi e kai ana i te ngahere, ki te mura hoki e toro ai ngā maunga;

¹⁵kia pērā te whai o tāu āwhā i a rātou, tāu whakaohorere hoki i a rātou ki tāu paroro.

¹⁶Whakakīia ō rātou kanohi ki te whakamā; kia rapu ai rātou ki tōu ingoa, e Ihowā.

¹⁷Kia whakamā, kia ohorere rātou ake ake; āe, kia numinumi rātou, kia ngaro hoki.

¹⁸Kia mātau ai rātou, ko koe anake, ko Ihowā nei tōu ingoa, te Runga Rawa i te whenua katoa.