Taalifi cant 140

¹Mu jëm ci njiital woykat yi, dib taalifu cant, ñeel Daawuda. Éy Aji Sax ji, xettali ma ci ku bon, musal ma ci nitu fitna,

²kuy nas lu bon, tey saxoo di sookey xare,

³daas làmmiñam ni jaan, guux daŋaru ñàngóor. Selaw.

⁴Éy Aji Sax ji, aar ma ci loxol ku bon, musal ma ci nitu fitna, ku may fexee fakkastal.

⁵Ñu bew ñee ma làqali yeer, lalal may buum aki caax, feggal ma seeni fiir ci yoon wi. Selaw.

⁶Dama ne Aji Sax ji, yaay sama Yàlla; Aji Sax ji, teewlul, ma dagaan la.

⁷Aji Sax ji Boroom bi may walloo doole, yaa ma yiir keroog bésub xare.

⁸Aji Sax ji, bul may ku bon nammeelam, bul matal pexeem, muy yékkatiku. Selaw.

⁹Ñi ma sam, yal na seen ayu làmmiñ këppu ci seen kaw bopp.

¹⁰Yal nañu këppoo xali sawara, tàbbi ciy pax te dootuñu jóg.

¹¹Kuy yàq der, yàlla bumu toog ci réew mi. Nitu fitna, yal na ko ay topp, ba dal ci kawam.

¹²Xam naa ne Aji Sax jeey jox néew-ji-doole dëgg; di sàmm àqu baadoolo.

¹³Ku jëfe njekk kay moo lay sant; ku jub dëkke saw yiw.