Salmo 11

¹Ginsulat ni David. Sa direktor sang mga manugkanta. Sa Ginoo ako nagapangayo sang proteksyon. Gani ngaa nga nagasiling kamo sa akon, “Palagyo ka sa mga bukid pareho sa pispis,

²kay ginabinat na sang mga malain ang ila mga pana sa madulom nga lugar para panaon ang mga nagakabuhi sing husto.

³Ti, ano ang mahimo sang mga matarong kon wala na sing kahusayan ang banwa?”

⁴Ara ang Ginoo sa iya balaan nga templo; didto sa langit ang iya trono. Ginatan-aw niya kag ginausisa ang tanan nga tawo.

⁵Ginausisa niya ang mga matarong kag ang mga malain. Ginakaugtan niya ang mga mapintas.

⁶Paulanan niya sang nagadabadaba nga mga baga kag asupre ang mga malain; kag mabaton nila halin sa iya ang mainit nga hangin nga magapaso sa ila.

⁷Kay matarong ang Ginoo kag luyag niya ang mga buhat nga matarong. Gani ang mga nagakabuhi sing husto makapalapit sa iya presensya.