Waiata 106

¹Whakamoemititia a Ihowā! Whakawhetai ki a Ihowā; he pai hoki ia; he pūmau tonu hoki tāna mahi tohu.

²Mā wai e kōrero ngā mahi nunui a Ihowā; e whakakite katoa ngā whakamoemiti ki a ia?

³Ka hari te hunga e mau ana ki te whakarite tika; me te kaimahi i te tika i ngā wā katoa.

⁴Maharatia mai ahau, e Ihowā, kia rite ki tāu manako ki tāu iwi; tirotirohia mai ahau i runga i tāu whakaoranga;

⁵kia kite ai ahau i te pai o āu i whiriwhiri ai, kia koa ai, koa tahi me tāu iwi, kia whakamanamana tahi ai me tōu kāinga tupu.

⁶Kua hara tahi mātou me ō mātou mātua, kua mahi mātou i te kino, i te mea hē.

⁷Kīhai ō mātou mātua i mōhio ki āu mea whakamīharo i Īhipa, kīhai hoki i mahara ki te tini o āu arohatanga; engari ia i whakatoi rātou ki a koe i te moana, āe, i te Moana Whero.

⁸Otirā, whakaorangia ana rātou e ia, he whakaaro ki tōna ingoa, kia mātauria ai tōna kaha.

⁹I rīria anō e ia te Moana Whero, ā, kua maroke; nā, ārahina ana rātou e ia i ngā rire, ānō ko waenga koraha.

¹⁰Nā, whakaorangia ake rātou e ia i te ringa o te tangata i kino ki a rātou; ā, hokona ana rātou i roto i te ringa o te hoariri.

¹¹Ā, taupokina ana e ngā wai ō rātou hoariri, hore rawa tētahi mōrehu.

¹²Nā, whakapono ana rātou ki āna kupu; ā, waiata ana i te whakamoemiti ki a ia.

¹³Hohoro tonu tō rātou wareware ki āna mahi; kīhai i tāria e rātou tōna whakaaro.

¹⁴Engari, i whakaputa nui i ō rātou hiahia i te tahora, whakamātautau ana rātou i te Atua i te koraha.

¹⁵Nā, ka hoatu e ia tā rātou i īnoi ai, otirā, i tukua atu e ia te hīroki ki tō rātou wairua.

¹⁶I hae hoki rātou ki a Mohi i te puni, ki a Ārona anō, ki te tangata tapu a Ihowā.

¹⁷Ko te hāmamatanga o te whenua, nā, horomia ana a Ratana; ā, taupokina iho te rōpū o Āpirama.

¹⁸Ā, mura ana te ahi i tō rātou rōpū; wera ana i te mura te hunga kino.

¹⁹I hangā e rātou he kūao kau ki Horepa, ā, koropiko ana ki te whakapakoko i whakarewaina.

²⁰Koia i whitia ai e rātou tō rātou korōria mō te mea i rite ki te pūru kai tarutaru.

²¹Wareware ake i a rātou te Atua, tō rātou kaiwhakaora, i mahi nei i ngā mea nunui ki Īhipa,

²²i ngā mahi whakamīharo ki te whenua o Hama, i ngā mea whakamataku ki te Moana Whero.

²³Nā, ka mea ia, kia whakangaromia rātou – me i kaua a Mohi, tāna i whiriwhiri ai, te tū ki tōna aroaro i te takiwā, hei papare ake i tōna riri, kei hunā rātou e ia.

²⁴Āe rā, i whakahāwea rātou ki te whenua āhuareka; kīhai rātou i whakapono ki tāna kupu.

²⁵Heoi, amuamu ana i roto i ō rātou tēneti, kīhai i whakarongo ki te reo o Ihowā.

²⁶Nā reira ka ara tōna ringa ki a rātou, ki te turaki i a rātou i te koraha;

²⁷ki te turaki i ō rātou uri i roto i ngā iwi, ki te whakamarara i a rātou ki ngā whenua.

²⁸I whakauru atu hoki rātou ki a Paara-Peoro, ā, kai ana i ngā patunga tapu mā ngā mea mate.

²⁹Koia i whakapātaritari ai rātou i a ia ki ā rātou hanga kia riri, ā, pakaru ana mai te mate urutā ki a rātou.

³⁰Nā, ko te whakatikanga ake o Pinehaha, ki te whakaputa whakawā; ā, mutu iho te mate.

³¹I kīia ai ia he tika i ngā whakatupuranga katoa ake ake.

³²I whakapātaritari anō rātou i a ia ki ngā wai o Meripa; nā, hēmanawa ana a Mohi mō rātou;

³³nā rātou hoki i whakatoi tōna wairua, i hē ai te kupu a ōna ngutu.

³⁴Kīhai rātou i whakangaro i ngā iwi i kīia nei e Ihowā ki a rātou,

³⁵heoi uru ana ki roto ki ngā tauiwi, ā, ako ana i ā rātou mahi.

³⁶I mahi hoki rātou ki ā rātou whakapakoko, i māhangatia ai rātou.

³⁷Āe, i patua e rātou ā rātou tama me ā rātou tamāhine mā ngā atua māori;

³⁸i whakahekea hoki te toto harakore, ngā toto o ā rātou tama, o ā rātou tamāhine, i patua nei e rātou mā ngā whakapakoko o Kanaana; ā, poke iho te whenua i te toto.

³⁹Nā, poke iho rātou i ā rātou mahi, ā, pūremu ana ki ā rātou mahi.

⁴⁰Koia i mura ai te riri o Ihowā ki tāna iwi, ā, whakarihariha ana ia ki tōna kāinga tupu;

⁴¹ā, tukua ana rātou e ia ki te ringa o ngā tauiwi; waiho ana te hunga i kino ki a rātou hei rangatira mō rātou.

⁴²Nā, ka tūkinotia rātou e ō rātou hoariri; ka pēhia ki raro i ō rātou ringa.

⁴³He maha āna whakaoranga i a rātou, ko rātou ia i whakatoi ki a ia i ō rātou whakaaro, ā, whakaititia ana i tā rātou kino.

⁴⁴Ahakoa rā, i titiro ia ki tō rātou matenga, i tōna rongonga i tā rātou tangi.

⁴⁵I mahara hoki ia ki tāna kawenata ki a rātou, ā, rite tonu ki te tini o āna mahi aroha te putanga kētanga o ōna whakaaro.

⁴⁶I meinga hoki rātou e ia kia arohaina e te hunga katoa i whakaraua atu ai rātou.

⁴⁷Whakaorangia mātou, e Ihowā, e tō mātou Atua, kohikohia mātou i roto i ngā tauiwi, kia whakawhetai ai ki tōu ingoa tapu, kia whakamanamana ai ki tōu whakamoemiti.

⁴⁸Kia whakapaingia a Ihowā, te Atua o Īharaira, i tua whakarere anō, ā ake ake. Ā, kia mea katoa te iwi, “Āmine.” Whakamoemititia a Ihowā!