Kàdduy waare 5

¹Moytul sa bopp booy dem kër Yàlla. Duggal te déglu, bala ngay def saraxi dof bu xamul ne mu ngi def lu bon.

²Bul rattax làmmiñ, bul gaawa dikke Yàlla mbir. Yàllaa ngi kaw asamaan, yaw yaa ngi fi suuf. Kon na say kàddu néew.

³Bu xalaat baree, indi gént; bu wax baree, waxi dof jib.

⁴Boo digook Yàlla, bu ko yeexe. Daray foontukat neexul, defal li nga dige.

⁵Baña digee gën dige loo deful.

⁶Bu la sa làmmiñ yóbbe bàkkaar, ba ngay layal ndawal Yàlla la, naan lii njuumte la woon. Ana lu jar Yàlla di la meree sa kàddu, bay neenal saw ñaq?

⁷Wax ju bare, caaxaani neen; mook gént yu baree yem. Kon, Yàlla, ragal ko.

⁸Boo gisee ñuy noot néew-ji-doole, di jalgati dëgg ak yoon cib gox, bumu la jaaxal; kilifa gi, kilifaam a ko yiir; ñoom it seen kilifaa leen yiir.

⁹Xanaa ndax buur suqal mbey mi, ba ñépp jariñoo suuf si.

¹⁰Bëggkatu xaalis du doyal xaalis, bëggkatu alal du doyal tono, te loolu it, cóolóoli neen.

¹¹Bu koom yokkoo, ña cay lekk yokku. Ana lu muy jariñ boroom koom ga, xanaa di ko duufale bëtam?

¹²Surga, lekkam néew, bare, mu nelaw, ba fàttey boram; boroom alal regg, du noppalu, du nelaw.

¹³Naqar wu réy laa gis fi kaw suuf: alal ju boroom dajale ba loru,

¹⁴mbaa pexeem moy, mu sànkule; ba bu amee doom it, du ko wacce dara.

¹⁵Nga juddoo ci sa ndey loxoy neen, walbatiku dellu na nga dikke woon. Du dara loo ñaqoon ba yóbbaale ko.

¹⁶Dikke ni, delloo ni, loolu it tiis wu réy la. Doñ-doñi, ngelawal neen, ana jariñ la?

¹⁷Ngay dunde tiis bésoo bés, ak naqar ak wopp ak xol bu tàng!

¹⁸Lii daal laa ci gis, man. Li gën te jaadu ci nit: na lekk, naan te bànneexoo ñaqam wu mu ñaqe kaw suuf giiru dund gi ko Yàlla may. Loolu mooy céram.

¹⁹Alal ak koom, ku ko Yàlla may, may ko mu tal koo xéewloo, mu nangu céram, bànneexoo ñaqam, loolu mayu Yàllaa.

²⁰Yàllaa koy bànneexal, ba du tiisoo ay fanam.