Banzembo 8

¹Wuta na buku ya mokambi ya bayembi. Nzembo ya Davidi ; ezali ya koyemba na lindanda ya bato ya Gati. Oh Yawe, Nkolo na biso, Kombo na Yo ezali monene kati na mokili mobimba ! Ovandisi nkembo na Yo kati na Lola.

²Na nzela ya masanzoli ya bana mpe bana mike, otelemisi ndako batonga makasi, mpo na kotelemela bayini na Yo mpe kokanga monoko ya monguna mpe ya moto oyo alingaka kozongisa mabe na mabe.

³Tango natalaka Lola na Yo, mosala ya misapi na Yo, sanza mpe minzoto oyo otia,

⁴namitunaka : Moto azali nini mpo ete okanisa ye, mpe moto azali nani mpo ete obatela ye ?

⁵Osalaki ye moke koleka ba-anjelu mpe olatisaka ye motole ya nkembo mpe ya lokumu ;

⁶otia ye moyangeli ya misala ya maboko na Yo, otia nyonso na se ya matambe na ye :

⁷bameme, bantaba, bangombe mpe banyama ya zamba,

⁸bandeke ya likolo, mbisi ya ebale monene mpe nyonso oyo etambolaka na bibale.

⁹Oh Yawe, Nkolo na biso, Kombo na Yo ezali monene kati na mokili mobimba !