Taalifi cant 7

¹Di woyu njàmbat, ñeel Daawuda. Mu woyaloon ko Aji Sax ji ci mbirum kàddu yu tukkee woon ca Kuus, ma bokkoon ci giirug Beñamin. Éy Aji Sax ji, sama Yàlla, yaw laay làqoo! Musal ma, xettali maak ñi may dàq ñépp.

²Lu ko moy ñu fàdd ma ni gaynde, daggate ma te kenn du wallu.

³Aji Sax ji sama Yàlla, ndegam maa def lii, ndegam maa taq fenn lu ñaaw,

⁴ndegam ku ma jàmmal laa feye aw ay, mbaa ma dimbali ku ko noonoo te defu ko dara,

⁵yal na ma noon rëbb, dab ma, dëggaate ma, sàggi saab sag, tëral ci pëndub suuf. Selaw.

⁶Aji Sax ji, meral, jóg, dajeel maak xadaru noon yi! Ngalla teewlu ma; yaw, yoon nga santaane.

⁷Yal na xeet yi daje, wër la, nga délsi tiim leen fu kawe.

⁸Yal na Aji Sax ji àtte xeet yi; Aji Sax ji, seetal ci sama njubteek sama màndute te dëggal ma.

⁹Yal na mbonug ku bon tees, te nga saxal ku nekk ci dëgg. Yaw Yàlla Boroom dëgg, yaay natt xel ak xol.

¹⁰Sama kaaraange, fa Yàlla miy musal boroom xol bu dëggu.

¹¹Yàllaay àtte dëgg. Yàllaay rëbbe bés bu ne.

¹²Ku tuubul, Yàlla nàmm saamaram, tàwwig fittam, diir la.

¹³Moom la waajalal ngànnaayi dee, def ko fitt yuy boy.

¹⁴Ku bon a ngoog, di matu doomu ñaawtéef. Day sos njombe, di wasin njublaŋ.

¹⁵Am kan lay gas, ba mu xóot, te pax ma mu gas, moo ca tàbbi.

¹⁶Fitnaam, këpp ci boppam; coxoram, xàŋŋ cim kaaŋam.

¹⁷Naa sante Aji Sax ji njubteem, ma woy Aji Sax jiy Aji Kawe ji.