Taalifi cant 77

¹Mu jëm ci Yedutun, njiital woykat yi, dib taalifu cant, ñeel Asaf. Naa xaacu, woo Yàlla, sama baat fa Yàlla, ngir mu déglu ma.

²Bëccëg, ma jàq, sàkku ndimbalal Boroom bi; guddi, ma tàllal loxo, toqiwuma. Sama xol tëë sedd.

³Ma bàyyi Yàlla xel, binni, xalaat, xol jeex. Selaw.

⁴Éy Yàlla, tere nga maa gëmm bët, ma jaaxle ba waxatuma,

⁵xanaa xalaat janti démb, at ya woon.

⁶Guddi may fàttaliku sama woy, di waxtaan ak sama ngegenaay, sama xel di jéex te naa:

⁷«Boroom bi da may gàntal ba fàww, ba du ma baaxeeti mukk a?

⁸Xanaa daa jeexal ngor tàkk? Am kàddoom a deñ ba fàww?

⁹Moo, mbaa du Yàlla daa fàtte ñeewante? Am meram a tëj buntu yërmandeem?» Selaw.

¹⁰Ma ne, sama naqar daal mooy Aji Kawe ji daa soppi loxoom.

¹¹Waaye naa fàttaliku jaloorey Ki Sax rekk, fàttaliku kéemaanam ya woon.

¹²Naa xalaat sa bépp liggéey, di jàngat say jëf.

¹³Céy Yàlla, yaa sell jikko! Jan yàllaa màgg ni Yàlla?

¹⁴Yaa di Yàlla juy jëfi kéemaan, yaa siiwal sa doole ci biir xeet yi.

¹⁵Kàttan nga jote sa mbooloo ma, sëti Yanqóobaak Yuusufa. Selaw.

¹⁶Yàlla, ndox maa la gis, ndox maa la gis, di lox; xóote yaa say,

¹⁷niir ya yuri, kàddu riire asamaan, say fitt, fettaxandoo,

¹⁸nga dënoo biir callweer, melax yi taal àddina, suuf di lox, di reg-regi.

¹⁹Biir géej di saw yoon; saw xàll ci digg ndox mu ne xéew, te kenn gisul foo teg tànk!

²⁰Wommat nga sa mbooloo ni ag jur, Musaak Aaróona jiite.