Waiata 66

¹Ki te tino kaiwhakatangi. He hīmene, he waiata. Hāmama, e te whenua katoa, ki te Atua!

²Hīmenetia te korōria o tōna ingoa, kia whai korōria te whakamoemiti ki a ia.

³Mea atu ki te Atua, “Anō te wehi o āu mahi! Mā te nui o tōu kaha e ngohengohe ai ōu hoariri ki a koe.

⁴E koropiko katoa te whenua ki a koe; ka hīmene ki a koe; ka hīmene rātou ki tōu ingoa.” Hera

⁵Haere mai kia kite i ngā mahi a te Atua: mataku rawa tāna mahi ki ngā tama a te tangata.

⁶Nāna i mea te moana hei tuawhenua; haere ā-waewae ana rātou rā roto i te awa; hari ana mātou ki a ia i reira.

⁷Ko tōna kāwanatanga tūturu tonu i runga i tōna kaha; e titiro ana ōna kanohi ki ngā tauiwi; kei whakakake te hunga tutū. Hera

⁸Whakapaingia tō tātou Atua, e ngā iwi; kia rangona te reo whakamoemiti ki a ia.

⁹Nāna nei hoki i mau ai tō tātou wairua ki te ora, kāhore hoki e tukua e ia ō tātou waewae kia nekehia.

¹⁰Kua whakamātauria hoki mātou e koe, e te Atua; whakarewaia ana mātou e koe, ānō he hiriwa e whakarewaia ana.

¹¹Kua kawea nei mātou e koe ki roto ki te kupenga; whakapīkaua ana e koe te mea whakamamae ki ō mātou hope.

¹²I meinga anō e koe ō mātou upoko kia ekengia hōihotia e te tangata; i rā roto mātou i te kāpura, i te wai; heoi whakaputaina mai ana mātou e koe ki te wāhi mōmona.

¹³Ka tomo ahau me ngā tahunga tinana ki tōu whare; ka whakamana ahau i āku kupu taurangi ki a koe,

¹⁴ērā i puaki i ōku ngutu, i kōrerotia e tōku māngai i ahau e pōuri ana.

¹⁵Ka whakaekea e ahau māu ngā mea mōmona hei tahunga tinana, ngātahi anō me te mea kakara o ngā hipi toa; ka tukua e ahau he pūru, he koati. Hera

¹⁶Haere mai, whakarongo, e koutou katoa e wehi ana ki te Atua, ā, māku e whakapuaki tāna i mea ai ki tōku wairua.

¹⁷I tangi tōku māngai ki a ia; i whakanuia anō ia e tōku arero.

¹⁸Ki te whakaaroa e tōku ngākau te hē, e kore te Ariki e whakarongo mai.

¹⁹Nei rā he pono kua whakarongo te Atua, kua tahuri ia ki tōku reo īnoi.

²⁰Kia whakapaingia te Atua, kīhai nei i whakapeau kē i tāku īnoi, i tāna atawhai hoki ki ahau.