Taalifi cant 55

¹Mu jëm ci njiital woykat yi, ànd aki xalam, dib taalifu yeete, ñeel Daawuda. Éy Yàlla, déglul, ma ñaan la, bul làqu, dama lay dagaan.

²Teewlu ma, nangul ma. Li may tawat a ma xañ jàmm, ub sama bopp;

³coowal noon yee ak coonob ñu bon ñi. Dañu maa teg fitna, di ma songe xadar.

⁴Sama fit a ngi rëcc, di tëf-tëfi; tiitaangey dee ne ma taral.

⁵Njàqaree ma dugg, may kat-kati, musiba mëdd ma.

⁶Dama ne: «Éy ku may may laafi xati, ma ne fërr, noppaluji.

⁷Xanaa ma naaw, ba sore, fanaani màndiŋ ma. Selaw.

⁸Naa gaawtu, seeluji ngelaw lu riddi ak ngëlén.»

⁹Éy, Boroom bi, beenal seeni wax, neenal leen. Damaa gis fitnaak xuloo ci dëkk bi,

¹⁰guddeek bëccëg ñuy wër, ñaawtéef ak ayib wéttali leen.

¹¹Yàq a nga ca biir, te nooteel ak njublaŋ jógul ca pénc ma.

¹²Su doon noon bu may ñaawal, ma muñ ko, mbaa muy bañ bu may won ab dayo, ma daw ko.

¹³Waaye yaw la, sama nawle, di sama wóllëre, ma xam la.

¹⁴Nu daan bokk bànneexu diisoo, ànd ak mbooloo, di jaamuji kër Yàlla ga.

¹⁵Yal na leen dee bett, ñu jekki tàbbi njaniiw, ngir mbon ga ci seen biir ak seen dëkkuwaay.

¹⁶Waaye man, Yàlla laay woo wall, te Aji Sax jee may wallu.

¹⁷Subaak ngoon ak njolloor, may ñaxtooka ñurumtu, mu dégg ma.

¹⁸Moo may jot ak jàmm, ba ma mucc ci xare ya ma ñu bare di songe.

¹⁹Yàllaay dégg, duma leen, moom mi nguuram yàgga sax. Selaw. Soppikuwuñu fenn te ragaluñu Yàlla.

²⁰Workat baa ngi xàcc loxoom jëme ci ñi mu takktool, di fecci kóllëre,

²¹làmmiñ wa daa neex ni lem, te xare lal xol ba; kàddu ya gëna nooy ag oliw te di saamar bu génn mbaram.

²²Sippikul Aji Sax ji lu la diis, moom moo lay taxawu. Du bàyyi mukk aji jub, muy tërëf.

²³Waaye yaw Yàlla, yaa leen di tàbbal, bóomkat ak naaféq ci pax mu xóota xóot, te seen dund xaajul. Man nag, ma di la wóolu.