Taalifi cant 45

¹Mu jëm ci njiital woykat yi, dëppook galan bu ñuy wax Tóor-tóor, ñeel askanu Kore wu góor, dib taalifu yeete, te di woyu mbëggeel. Woy wu neex a fees sama xol, may taalifal Buur, sama làmmiñ ni xalimag bindkatu ndaanaan.

²Yaa gëna góorayiwe ci àddina, sa kàddu diw yiw, ndax Yàllaa la barkeel ba fàww!

³Jàmbaaroo, takkal sa saamar, te yànj, am daraja;

⁴ànd ak daraja, dawal ba am ndam, di dawal dëgg ak yërmande ji war, ba mana def ay jaloore.

⁵Yaw Buur, say fitt a ñaw, di jam say noon ci xol, ay xeet daanu, nga tiim.

⁶Yaw Yàlla, sab jal a sax dàkk ba fàww. sa yetu buur njub la,

⁷yaa sopp dëgg, bañ lu bon, ba Yàlla, sa Yàlla diwe la diwu mbég, nga tiim say moroom:

⁸sa yére yépp di gilli ndàbbu miir, ak alowes akum kanel, ñu di la bégale xalam, ca sa biir kër yu yànj.

⁹Ay doomi buur a ngi ci jigéen ñi nga teral, sab lingeer féete la ndijoor, takkoo ngëneelu wurus.

¹⁰Janq doom, gisal, déglul te teewlu ma, fàtteel say bokk, fàtte sa kër baay,

¹¹Buur xemmeme la sab taar; mooy sab sang, wormaal ko.

¹²Waa Tir a lay yótsiy may, ay boroom alal di wut lu la neex.

¹³Séetu Buur duggsi na, ne ràññ, sol mbubb mu wurus way tàkk.

¹⁴Ñu yóbbul ko Buur, mu ne boyy, janq ja ànd ak moom, diy toppam, ñu indil leen Buur,

¹⁵ñu duggsi kër buur, ci biir mbégteek bànneex.

¹⁶Yaw Buur, yal na la sa doom yu góor wuutu ci seen jalu maam, nga def leeni kàngam ci réew mi mépp.

¹⁷Maa lay joobe ba sa tur du fey mukk, xeet yi saxoo laa sant ba fàww.