Waiata 40

¹Ki te tino kaiwhakatangi. He hīmene nā Rāwiri. I tatari mārie ahau ki a Ihowā; ā, anga ana ia ki ahau, whakarongo ana ki tāku karanga.

²Nā, kei te tango ake ia i ahau i te poka whakamataku, i te paru tāoruoru; kei te whakatū i ōku waewae ki runga ki te kōhatu, kei te whakaū i ōku hīkoinga.

³Ā, hōmai ana e ia he waiata hou ki tōku māngai, he whakamoemiti ki tō tātou Atua. He tokomaha e kite, ā, ka wehi, ka whakawhirinaki ki a Ihowā.

⁴Ka hari te tangata kua waiho nei e ia a Ihowā hei whakawhirinakitanga mōna; ā, kāhore e tahuri ki te hunga whakakake, ki te hunga hoki e peka ana ki te teka.

⁵E Ihowā, e tōku Atua, he tini āu mahi whakamīharo i mahia e koe, me ōu whakaaro ki a mātou. E kore e taea te kōrero whakatepe atu ki a koe; me i mea ahau kia whakakitea, kia kōrerotia, e kore e taea te tatau.

⁶Kīhai i matenuitia e koe te patunga tapu, me te whakahere; pokaia ana e koe ōku taringa. Kīhai koe i mea mai ki te tahunga tinana, ki te whakahere hara.

⁷Nā, ko tāku meatanga atu, “Nā, kua tae mai ahau; kei roto i te pukapuka te tuhituhi mōku.

⁸Ko taku pai ko te mea i tāu e pai ai, e tōku Atua; āe rā, kei tōku ngākau tāu ture.”

⁹Kua kauwhautia e ahau te tika i roto i te whakaminenga nui; nanā, kīhai i kopia ōku ngutu, tēnā koe te mātau ana, e Ihowā.

¹⁰Kīhai i hunā e ahau tōu tika i roto i tōku ngākau; kua kōrerotia e ahau tōu pono me tāu whakaoranga; kīhai, i hunā e ahau tōu aroha me tōu pono i te whakaminenga nui.

¹¹Kei kaiponuhia tōu aroha ki ahau, e Ihowā; mā tōu atawhai me tōu pono ahau e tiaki i ngā wā katoa.

¹²Tā te mea kua karapotia ahau e ngā kino e kore e taea te tatau; mau pū ahau i ōku kino, tē āhei te titiro ake; he tini kē i ngā makawe o tōku mātenga; ā, hemo iho tōku ngākau.

¹³Kia pai, e Ihowā, ki te whakaora i ahau; e Ihowā, hohoro ki te āwhina i ahau.

¹⁴Kia whakamā, kia pororaru ngātahi te hunga e rapu ana i tōku wairua kia whakamatea; kia whakahokia ki muri, kia whakamā te hunga e hiahia ana kia hē ahau.

¹⁵Kia hunā, hei utu mō tō rātou whakamā te hunga e mea mai ana ki ahau, “Ha, ha!”

¹⁶Kia hari, kia koa ki a koe te hunga katoa e rapu ana i a koe; kia mea tonu te hunga e pai ana ki tāu whakaoranga, “Kia whakanuia a Ihowā.”

¹⁷Ko ahau ia, he iti, he rawakore; heoi e whakaaro ana te Ariki ki ahau. Ko koe tōku āwhina, tōku kaiwhakaora; kaua rā e whakaroa, e tōku Atua.