Faarfannaa 37

¹Faarfannaa Daawit. Ati sababii namoota hamootiif jettee hin aarin yookaan warra jalʼina hojjetanitti hin hinaafin.

²Isaan akkuma margaa dafanii coollagu; akkuma biqiltuu misee dafanii gogu.

³Waaqayyoon amanadhu; waan gaariis hojjedhu; biyyattii keessa jiraadhu; nagaas qabaadhu.

⁴Waaqayyotti gammadi; innis hawwii garaa keetii siif guuta.

⁵Karaa kee Waaqayyotti kennadhu; isa amanadhu; inni siif milkeessa.

⁶Inni qajeelummaa kee akka aduu ganamaatti, murtii kee immoo akka aduu saafaatti ibsa.

⁷Waaqayyo duratti calʼisi; obsaanis isa eeggadhu; nama karaan isaa qajeeleefitti, kan hammina hojjetuttis hin hinaafin.

⁸Aarii irraa of eegi; dheekkamsa irraas deebiʼi; hin aarin; aariin hammina qofatti nama geessaatii.

⁹Namoonni hamoon ni balleeffamuutii; warri Waaqayyoon abdatan garuu lafa dhaalu.

¹⁰Namoonni hamoon yeroo xinnoodhaaf malee siʼachi hin jiraatan; yoo ati isaan barbaadde illee hin argaman.

¹¹Garraamonni garuu lafa ni dhaalu; nagaa guddaadhaanis ni gammadu.

¹²Namoonni hamoon nama qajeelaatti mariʼatu; ilkaan isaaniis isatti qaratu;

¹³Gooftaan hamootatti ni kolfa; inni akka guyyaan isaanii dhiʼaate ni beekaatii.

¹⁴Namoonni hamoon hiyyeeyyii fi rakkattoota lafaan dhaʼuudhaaf, warra karaan isaanii qajeelaa taʼe immoo gorraʼuudhaaf, goraadee isaanii luqqifatu; iddaa isaaniis ni dabsatu.

¹⁵Goraadeen isaanii garuu garaadhuma isaanii waraana; iddaan isaaniis ni caccaba.

¹⁶Badhaadhummaa hamoonni baayʼeen qaban irra, waan xinnoo namni qajeelaan qabu wayya;

¹⁷humni hamootaa ni cabaatii; Waaqayyo garuu qajeeltota jabeessee ni dhaaba.

¹⁸Waaqayyo bara tolootaa ni beeka; dhaalli isaaniis bara baraan jiraata.

¹⁹Isaan bara hamaa keessa hin qaanaʼan; bara beelaa keessas ni quufu.

²⁰Namoonni hamoon garuu ni barbadaaʼu; diinonni Waaqayyoos akkuma miidhagina daraaraa dirree ti; isaan ni badu; akkuma aaraa ni badu.

²¹Namoonni hamoon ni liqeeffatu; garuu deebisanii of irraa hin baasan; qajeeltonni garuu arjummaadhaan kennu;

²²warri Waaqayyo eebbisu lafa ni dhaalu; warri inni abaaru garuu ni balleeffamu.

²³Adeemsi nama Waaqayyo biraa ajajama; inni karaa namicha sanaatti ni gammada.

²⁴Inni yoo gufate illee lafa hin gaʼu; Waaqayyo harka isaatiin qabee isa dhaabaatii.

²⁵Ani dargaggeessan ture; amma immoo dulloomeera; garuu qajeeltonni gatamuu isaanii yookaan ijoolleen isaaniis buddeena kadhachuu isaanii hin argine.

²⁶Qajeeltonni yeroo hundumaa ni arjoomu; ni liqeessus; ijoolleen isaaniis ni eebbifamu.

²⁷Waan hamaa irraa deebiʼiitii waan gaarii hojjedhu; yoos ati bara baraan ni jiraatta.

²⁸Waaqayyo murtii qajeelaa jaallataatii; warra isaaf amanamanis hin gatu. Isaanis bara baraan ni eegamu; sanyiin hamootaa garuu ni balleeffama.

²⁹Qajeeltonni lafa ni dhaalu; bara baraanis ishee irra ni jiraatu.

³⁰Afaan nama qajeelaa ogummaa dubbata; arrabni isaas murtii qajeelaa labsa.

³¹Seerri Waaqa isaa garaa isaa keessa jira; miilli isaas hin mucucaatu.

³²Namoonni hamoon qajeeltota gaadu; isaan ajjeesuus ni barbaadu;

³³Waaqayyo garuu harka isaaniitti jara hin dhiisu yookaan yommuu isaan murtiitti dhiʼeeffamanitti, akka isaanitti murteeffamu hin eeyyamu.

³⁴Waaqayyoon eeggadhu; karaa isaas eegi. Inni akka ati lafa dhaaltuuf ulfina siif kenna; atis badiisa hamootaa ni argita.

³⁵Nama hamaa fi gara jabeessa, isaa akkuma muka iddoon isaa itti tolee jiru nan arge.

³⁶Ergasiis achiin nan darbe; inni garuu achi hin turre; ani cimsee isa nan barbaade; inni garuu hin argamne.

³⁷Nama mudaa hin qabne yaadatti qabadhu; tolootas ilaali; sanyiin nama nagaa hin baduutii.

³⁸Cubbamoonni hundinuu garuu ni barbadeeffamu; galgalli nama hamaas hin tolu.

³⁹Fayyinni qajeeltotaa Waaqayyo biraa dhufa; inni yeroo rakkinaatti daʼoo isaanii ti.

⁴⁰Waaqayyo isaan gargaara; isaan oolchas; harka namoota hamoo jalaa isaan baasa; isaan baraaras; isaan isatti kooluu galaniiruutii.