Waiata 22

¹Ki te tino kaiwhakatangi: Airete Hahara. He hīmene nā Rāwiri. E tōku Atua, e tōku Atua, he aha koe i whakarere ai i ahau? He aha koe i matara atu ai ki te whakaora i ahau, i ngā kupu hoki o tāku hāmama?

²E tōku Atua, e karanga nei ahau i te awatea, heoi kāhore koe e rongo, i te pō anō kāhore ahau e wahangū.

³Otiia he tapu koe, kei ngā whakamoemiti a Īharaira tōu nohoanga.

⁴I whakawhirinaki ō mātou mātua ki a koe, i whakawhirinaki, ā, whakaorangia ana e koe.

⁵I karanga rātou ki a koe, ā, kua ora; i whakawhirinaki ki a koe, ā, kīhai i whakamā.

⁶Ko ahau ia he toke, ehara i te tangata; e tāwaia ana e te tangata, e whakahāweatia ana e te iwi.

⁷Kataina iho ahau e te hunga katoa e kite ana i ahau, kō ana ō rātou ngutu, rūrū ana ō rātou mātenga, e kī mai ana,

⁸“Tukua atu koe ki a Ihowā, māna ia e whakaora; māna ia e whakaora, e pai ana hoki ia ki a ia.”

⁹Nāu ia ahau i whakawhānau mai i roto i te kōpū, i mea hoki kia tūmanako, i ahau i ngā ū o tōku whaea.

¹⁰He mea whakarere atu ahau ki runga ki a koe nō te kōpū mai; ko koe tōku Atua nō te kōpū mai anō o tōku whaea.

¹¹Kei mamao atu i ahau, e tata ana hoki te hē, kāhore hoki he kaiāwhina.

¹²He tini ngā pūru e karapoti nei i ahau; e whakapaea ana ahau e ngā mea kaha o Pahana.

¹³E hāmama ana ō rātou māngai ki ahau, ānō he raiona e haehae ana, e hāmama ana.

¹⁴Kua ringihia ahau, ānō he wai, kua takoki katoa ōku iwi; me te ware pī tōku ngākau, e rewa ana i waenganui i ōku whēkau.

¹⁵Kua maroke tōku kaha, ānō he maramara rīhi, piri tonu tōku arero ki ōku kauae. Kua whakatakotoria anō ahau e koe ki te puehu o te mate.

¹⁶Kua karapotia nei hoki ahau e te kīrehe, kua muia e te whakaminenga o ngā tāngata hara; kua pokaia e rātou ōku ringa me ōku waewae.

¹⁷E taea e ahau te tatau ōku iwi katoa; e titiro mai ana rātou, e mātakitaki ana ki ahau.

¹⁸E wehewehea ana ōku kākahu mō rātou, e maka rota ana mō tōku weruweru.

¹⁹Kaua rā ia koe e matara atu, e Ihowā; e tōku kaha, hohoro mai hei āwhina mōku.

²⁰Whakaorangia tōku wairua i te hoari, tāku hoki e matenui nei i te kurī.

²¹Whakaorangia ahau i te māngai o te raiona. Āe, i ngā haona o ngā kau mākā kua whakahokia mai e koe he kupu ki ahau.

²²Ka kōrerotia e ahau tōu ingoa ki ōku tēina, ka whakamoemititia koe e ahau i waenganui i te whakaminenga.

²³E te hunga e wehi ana ki a Ihowā, whakamoemiti ki a ia; whakakorōriatia ia, e te uri katoa o Hākopa, kia wehi hoki ki a ia, e te uri katoa o Īharaira.

²⁴Kīhai hoki ia i whakahāwea, kīhai i whakarihariha ki te auē o te ngākau mamae; kīhai anō i huna i tōna mata ki a ia, engari i tāna karangatanga ki a ia i whakarongo ia.

²⁵Ko koe tāku e whakamoemiti ai i waenganui o te whakaminenga nui, ka whakamanā e ahau āku kupu taurangi ki te aroaro o te hunga e wehi ana ki a ia.

²⁶Ka kai te hunga māhaki, ā, ka mākona; ka whakamoemiti ki a Ihowā te hunga e rapu ana ki a ia. Kia ora tonu ō koutou ngākau, ake, ake!

²⁷E mahara ngā pito katoa o te whenua, ā, ka tahuri ki a Ihowā; ka koropiko anō ngā hapū katoa o ngā iwi ki tōu aroaro.

²⁸Nō Ihowā hoki te rangatiratanga, ko ia anō te kāwana i waenganui o ngā iwi.

²⁹Ka kai, ā, ka koropiko ngā tāngata tetere katoa o te whenua; ka tuohu ki tōna aroaro te hunga katoa e heke ana ki te puehu; tae noa ki te tangata kāhore e ora i a ia tōna wairua.

³⁰Tērā e mahi tētahi uri ki a ia; ka waiho ki te Ariki hei whakatupuranga.

³¹E haere mai rātou, e kauwhau i tōna tika ki te iwi e whānau ā mua, he meatanga tēnei nāna.