Waiata 147

¹Whakamoemititia a Ihowā! He pai hoki te hīmene ki tō tātou Atua; āhuareka rawa, ātaahua tonu te whakamoemiti.

²Ko Ihowā hei hanga i Hiruhārama; māna hoki ngā whati o Īharaira e kohikohi.

³Ko ia hei rongoā i te hunga ngākau marū; māna e takai ō rātou wāhi mamae.

⁴E taua ana e ia ngā whetū, te maha; e huaina ana hoki e ia ō rātou ingoa katoa.

⁵He nui tō tātou Ariki, he nui hoki tōna kaha; e kore e taea tōna mātauranga te whakaaro.

⁶Ko Ihowā te kaitautoko mō te hunga māhaki; ka turakina e ia te hunga kino ki te whenua.

⁷Waiata, whakawhetai ki a Ihowā; hīmene i runga i te hāpa ki tō tātou Atua.

⁸Ko ia nei te kaiuwhi i te rangi ki ngā kapua, te kaihanga i te ua mō te whenua; e whakatupu ana ia i te tarutaru ki runga ki ngā maunga.

⁹E hōmai ana e ia he kai mā te kīrehe; mā ngā pī raweni hoki ina tangi.

¹⁰E kore ia e āhuareka ki te kaha o te hōiho; e kore ia e manako ki ngā waewae o te tangata.

¹¹E manako ana a Ihowā ki te hunga e wehi ana i a ia, ki te hunga e tūmanako ana ki tōna aroha.

¹²Whakamoemititia a Ihowā, e Hiruhārama! Whakamoemititia tōu Atua, e Hiona!

¹³Nāna nei hoki i whakakaha ngā tūtaki o ōu tatau; manaakitia ana e ia āu tamariki i roto i a koe.

¹⁴Nāna anō i mau ai te rongo i roto i ōu rohe; nāna koe i mākona ai i te wīti pai rawa.

¹⁵E tukua ana e ia tāna kupu ki te whenua; tere rawa te rere o tāna kupu.

¹⁶E hōmai ana e ia te hukarere ānō he huruhuru hipi; e whakatītaritaria ana te haupapa ānō he pungarehu.

¹⁷Makā mai ana e ia tāna hauhunga ānō he maramara – ko wai e tū i mua i tāna mātao?

¹⁸E tukua ana e ia tāna kupu, ā, whakarewaina ana aua mea; ka meinga tāna hau kia pupuhi, rere ana ngā wai.

¹⁹E whakakitea ana e ia tāna kupu ki a Hākopa; āna tikanga, me āna whakaritenga ki a Īharaira.

²⁰Kāhore i pērā tāna hanga ki tētahi iwi; kīhai anō āna whakaritenga i mōhiotia e rātou. Whakamoemititia a Ihowā!