Waiata 119

¹Ka hari te hunga he tapatahi nei i te ara, e haere nei i te Ture a Ihowā.

²Ka hari te hunga e mau ana ki āna whakaaturanga; e whakapaua ana ō rātou ngākau ki te rapu i a ia,

³āe, e kore rātou e mahi i te kino; e haere ana rātou i āna ara.

⁴Kua oti mātou te whakahau ki āu akoranga, kia āta puritia e mātou.

⁵Auē, me i whakatikaia tōku ara ki te pupuri i āu akoranga!

⁶Ko reira ahau ka kore ai e whakamā; i ahau ka whai whakaaro nei ki āu whakahau katoa.

⁷Ka whakamoemiti ahau ki a koe i runga i te ngākau tika, ina ako ahau i āu whakaritenga tika.

⁸Ka puritia e ahau āu tikanga; kaua ahau e whakarērea rawatia.

⁹He aha te mea e mā ai i te taitamariki tōna ara? Kia rite ki tāu kupu tāna whakamaharatanga iho.

¹⁰Kua whakapaua e ahau tōku ngākau ki te rapu i a koe; kaua ahau e tukua kia kotiti kē i āu whakahau.

¹¹Kua whakatakotoria e ahau tāu kupu ki roto ki tōku ngākau, kei hara ahau ki a koe.

¹²E Ihowā, ka whakapaingia koe; whakaakona ahau ki āu tikanga.

¹³Kua whakapuakina e ōku ngutu ngā whakaritenga katoa a tōu māngai.

¹⁴Ko tōku koa i te ara o āu whakaaturanga, me te mea mō ngā taonga katoa.

¹⁵Ka whakaaroaro ahau ki āu ako, ā, ka whai mahara ki āu huarahi.

¹⁶He oranga ngākau ki ahau āu tikanga; e kore ahau e wareware ki tāu kupu.

¹⁷Kia atawhai ki tāu pononga, kia ora ai ahau; kia puritia ai hoki tāu kupu.

¹⁸Whakatirohia ōku kanohi kia kite ai ahau i ngā mea whakamīharo i roto i tāu ture.

¹⁹He manene ahau i runga i te whenua; kaua āu whakahau e hunā ki ahau.

²⁰Ka ngawhā tōku wairua i te matenui atu ki āu whakaritenga i ngā wā katoa.

²¹Kua rīria e koe te hunga whakakake kua oti nei te kanga, e kotiti kē nei i āu whakahau,

²²parea atu i ahau te tāwai me te whakahāwea, kua mau hoki ahau ki āu whakaaturanga.

²³I noho anō hoki ngā rangatira ki te kōrero kino mōku; otirā e whakaaro ana tāu pononga ki āu tikanga.

²⁴Ko āu whakaaturanga anō tōku oranga ngākau, ōku hoa whakatakoto whakaaro.

²⁵Piri tonu tōku wairua ki te puehu; whakahauoratia ahau kia rite ki tāu kupu.

²⁶I whakaaturia e ahau ōku ara, ā, whakahoki kupu ana koe ki ahau; whakaakona ahau ki āu tikanga.

²⁷Meinga ahau kia mātau ki te ara o āu ako, kia whakaaroaro ai ahau ki āu mahi whakamīharo.

²⁸E māturuturu iho ana tōku wairua i te pōuri; kia rite ki tāu kupu tāu whakaū ake i ahau.

²⁹Whakamataratia atu i ahau te ara o te teka; kia atawhai mai hoki, ā, hōmai tāu ture.

³⁰Kua whiriwhiria e ahau te ara o te pono; ka waiho e ahau āu whakaritenga ki tōku aroaro.

³¹Piri tonu ahau ki āu whakaaturanga, e Ihowā; kei whakamā ahau.

³²Ka oma ahau i te ara o āu whakahau, ina whakanuia e koe tōku ngākau.

³³E Ihowā, whakaakona ahau ki te ara o āu tikanga; ā, ka mau i ahau taea noatia te mutunga.

³⁴Hōmai he mātauranga ki ahau, ā, ka mau i ahau tāu ture; ka whakapaua tōku ngākau ki te pupuri.

³⁵Meinga ahau kia haere i te ara o āu whakahau; ko tāku hoki tēnā e whakaahuareka nei.

³⁶Whakaangahia tōku ngākau ki āu whakaaturanga; kaua hoki ki te apo.

³⁷Whakatahuritia kētia ōku kanohi kei kite i te horihori; whakahauorangia ahau i tāu ara.

³⁸Whakapūmautia tāu kupu ki tāu pononga, e wehi nei ki a koe.

³⁹Parea atu tōku tāwainga, e wehi nei ahau, he pai hoki āu whakaritenga.

⁴⁰Nanā, kua matenui ahau ki āu ako; whakahauorangia ahau i runga i tōu tika.

⁴¹Kia puta anō āu mahi tohu ki ahau, e Ihowā, arā tāu whakaoranga, kia rite ki tāu kupu.

⁴²Pēnei ka whai kupu māku ki tōku kaitāwai; nōku ka whakawhirinaki ki tāu kupu.

⁴³Kaua e tangohia rawatia i tōku māngai te kupu o te pono, e tūmanako nei hoki ahau ki āu whakaritenga.

⁴⁴Pēnei ka puritia e ahau tāu ture ake ake.

⁴⁵Ā, ka hāereere noa ahau, kua rapua hoki e ahau āu akoranga.

⁴⁶Ka kōrerotia anō e ahau āu whakaaturanga ki te aroaro o ngā kīngi, e kore anō e whakamā.

⁴⁷Ā, ka waiho e ahau hei oranga ngākau mōku āu whakahau e aroha nei ahau.

⁴⁸Ka toro atu hoki ōku ringa ki āu whakahau e aroha nei ahau, ka whakaaroaro anō ki āu tikanga.

⁴⁹Maharatia te kupu ki tāu pononga, nō te mea kua meinga ahau e koe kia tūmanako atu.

⁵⁰Ko tōku oranga ngākau tēnei i ahau e tangi nei; nā tāu kupu nei hoki ahau i whakahauora.

⁵¹Nui rawa te whakahī ki ahau o te hunga whakakake, heoi, kīhai ahau i peka kē i tāu ture.

⁵²I mahara ahau ki āu whakaritenga, e Ihowā, o tua iho; ā, mārie ana tōku ngākau.

⁵³Mau pū ahau i te pāwera, mō te hunga kino kua whakarere nei i tāu ture.

⁵⁴Ko āu tikanga āku e hīmene ai i te whare i noho manene ai ahau.

⁵⁵I mahara ahau ki tōu ingoa i te pō, e Ihowā, ā, puritia ana e ahau tāu ture.

⁵⁶I ahau tēnei, he mau nōku ki āu ako.

⁵⁷Ko Ihowā tōku wāhi; kua mea nei ahau, ka pupuri ahau i āu kupu.

⁵⁸I whakapaua tōku ngākau ki te īnoi ki a koe kia pai mai; kia rite ki tāu kupu tāu mahi tohu ki ahau.

⁵⁹I whakaaro ahau ki ōku ara, ā, anga ana ōku waewae ki āu whakaaturanga;

⁶⁰i hohoro ahau, ā, kīhai i whakaroa ki te pupuri i āu whakahau.

⁶¹Karapotia pūtia ana ahau e ngā here a te hunga kino, kīhai ia ahau i wareware ki tāu ture.

⁶²I waenganui pō ka ara ahau ki te whakawhetai ki a koe mō āu whakaritenga tika.

⁶³He hoa ahau nō te hunga katoa e wehi ana i a koe, nō te hunga anō e pupuri ana i āu ako.

⁶⁴Kī tonu, e Ihowā, te whenua i tāu mahi tohu; whakaakona ahau ki āu tikanga.

⁶⁵Pai rawa tāu hanga ki tāu pononga, e Ihowā, rite tonu ki tāu kupu.

⁶⁶Whakaakona ahau ki te ngārahu pai, ki te mātauranga; kua whakapono hoki ahau ki āu whakahau.

⁶⁷I ahau kīanō i whakawhiua, i hē ahau; tēnā ko tēnei, ka puritia e ahau tāu kupu.

⁶⁸He pai koe, he pai hoki āu mahi; whakaakona ahau ki āu tikanga.

⁶⁹Kua titoa e te hunga whakakake he teka mōku; ka whakapaua tōku ngākau ki te pupuri i āu ako.

⁷⁰He ngako rawa tō rātou ngākau, koia anō kei te taupā; ko ahau ia, he oranga ngākau ki ahau tāu ture.

⁷¹Mārie anō ahau kia pēhia e te pōuri; i ako ai ahau i āu tikanga.

⁷²Ko te ture a tōu māngai pai kē atu ki ahau i ngā mano o te kōura, o te hiriwa.

⁷³Nā ōu ringa ahau i hanga, i whakawhaiahua; hōmai he mātauranga ki ahau, kia ako ai ahau ki āu whakahau.

⁷⁴Ka hari te hunga e wehi ana i a koe ina kite i ahau; nōku i tūmanako ki tāu kupu.

⁷⁵E mātau ana ahau, e Ihowā, he tika āu whakaritenga, ā, he pono nōu i pēhia ai tōku ngākau e koe.

⁷⁶Tēnā rā, waiho tāu mahi tohu hei whakamārie mōku, kia rite ki tāu kupu ki tāu pononga.

⁷⁷Kia puta ki ahau āu mahi aroha, kia ora ai ahau; ko tāu ture hoki tōku oranga ngākau.

⁷⁸Kia whakamā te hunga whakakake, nō te mea kāhore he take i hē ai tā rātou hanga ki ahau; ko ahau ia ka whakaaroaro ki āu akoranga.

⁷⁹Ko te hunga e wehi ana ki a koe me anga ki ahau, ā, ka mōhio rātou ki āu whakaaturanga.

⁸⁰Kia tapatahi tōku ngākau ki āu tikanga; kei whakamā ahau.

⁸¹E matenui ana tōku wairua ki tāu whakaoranga; otiia ka tūmanako ahau ki tāu kupu.

⁸²Matawaia ana ōku kanohi he meatanga ki tāu kupu; i ahau e mea ana, “Āhea koe whakamārie ai i ahau?”

⁸³Kua rite nei hoki ahau ki te kōkī i roto i te paoa; he ahakoa e kore ahau e wareware ki āu tikanga.

⁸⁴E hia ngā rā o tāu pononga? Āhea koe whakarite whakawā ai mō te hunga e tūkino nei i ahau?

⁸⁵Kua keri poka te hunga whakakake mōku; he mea kāhore e rite ki tāu ture.

⁸⁶Pono tonu āu whakahau katoa; e tūkino takekore ana rātou i ahau; āwhinatia mai ahau.

⁸⁷Wāhi iti kua mōtī ahau i a rātou i runga i te whenua; otirā kīhai i mahue i ahau āu akoranga.

⁸⁸Kia rite ki tōu aroha tāu whakahauora i ahau; ā, ka puritia e ahau ngā whakaaturanga a tōu māngai.

⁸⁹Pūmau tonu tāu kupu, e Ihowā, ake ake i runga i te rangi.

⁹⁰Kei ngā whakatupuranga katoa tōu pono; whakaūngia ana e koe te whenua, ā, e tū nei anō.

⁹¹E tū nei anō ināianei, pērā tonu me tāu i whakarite ai, he pononga hoki ngā mea katoa nāu.

⁹²Me kaua tāu ture hei oranga mō tōku ngākau, kua ngaro ahau i reira i tōku auētanga.

⁹³E kore rawa ahau e wareware ki āu ako, he mea whakahauora hoki nāu ēnā i ahau.

⁹⁴Nāu ahau; māu ahau e whakaora, kua rapua hoki e ahau āu ako.

⁹⁵Kua tatari te hunga kino ki ahau kia whakamatea, ka whakaaro ia ahau ki āu whakaaturanga.

⁹⁶Kua kitea e ahau te mutunga o ngā mea tino tika katoa, he whānui rawa ia tāu whakahau.

⁹⁷Anō tōku aroha ki tāu ture! Ko tāku tēnā e whakaaroaro ai i te roa o te rā.

⁹⁸Nāu i hira ake ai ōku whakaaro i o ōku hoariri, nā āu whakahau, e piri tonu nei ki ahau.

⁹⁹Nui atu ōku mahara i o ōku kaiwhakaako katoa, nōku i whakaaroaro tonu ki āu whakaaturanga.

¹⁰⁰Tērā atu tōku mōhio i tō ngā kaumātua, nō te mea i pupuri ahau i āu ako.

¹⁰¹Kua kaiponuhia mai e ahau ōku waewae i ngā ara kino katoa, kia pupuri ai ahau i tāu kupu.

¹⁰²Kīhai ahau i tītaha i āu whakaritenga; nāu hoki ahau i ako.

¹⁰³Anō te reka o āu kupu ki tōku ngao, āe rā, reka atu i te honi ki tōku māngai.

¹⁰⁴Nā āu ako ahau i whai mōhio ai; nā reira ahau i kino ai ki ngā ara teka katoa.

¹⁰⁵He rama tāu kupu ki ōku waewae, he mārama ki tōku ara.

¹⁰⁶Kua oati ahau, ā, ka whakamanā anō e ahau, kia puritia e ahau āu whakaritenga tika.

¹⁰⁷He nui te mamae o tōku ngākau; whakahauorangia ahau, e Ihowā, kia rite ki tāu kupu.

¹⁰⁸Manakohia, e Ihowā, ngā ohaohatanga a tōku māngai, whakaakona hoki ahau ki āu whakaritenga.

¹⁰⁹Kei tōku ringa tonu tōku wairua, heoi kāhore ahau e wareware ki tāu ture.

¹¹⁰Kua whakatakotoria e te hunga kino he māhanga mōku, heoi, kāhore ahau i peka kē i āu ako.

¹¹¹Ka waiho e ahau āu whakaaturanga hei kāinga tupu mōku ake ake; ko tōku koanga ngākau hoki ēnā.

¹¹²Kua whakaanga e ahau tōku ngākau ki te mahi tonu i āu tikanga; ā te mutunga rā anō.

¹¹³E kino ana ahau ki te hunga whakaaro ruarua, ko tāu ture ia tāku e aroha ai.

¹¹⁴Ko tōku piringa koe, ko tōku whakangungu rākau; e tūmanako ana ahau ki tāu kupu.

¹¹⁵Mawehe atu i ahau, e te hunga kino, ka whakaritea hoki e ahau ngā whakahau a tōku Atua.

¹¹⁶Kia rite ki tāu kupu tāu tautoko ake i ahau, kia ora ai ahau, kaua hoki ahau e tukua kia whakamā ki tāku e tūmanako atu nei.

¹¹⁷Tautokona ake ahau, kia ora ai ahau, ā, ka whai whakaaro tonu ahau ki āu tikanga.

¹¹⁸Kua whakahāweatia e koe te hunga katoa e kotiti kē ana i āu tikanga; he horihori hoki tō rātou tinihanga.

¹¹⁹Ka whakakāhoretia e koe te hunga kino katoa o te whenua, ānō he para mata; koia ahau i aroha ai ki āu whakaaturanga.

¹²⁰Wiri ana ōku kikokiko i te wehi ki a koe, e mataku ana hoki ahau ki āu whakaritenga.

¹²¹He whakawā tika, he tika tāku mahi; kaua ahau e tukua ki ōku kaitūkino.

¹²²Ko koe hei tuarā mō tāu pononga mō te pai; kei tūkinotia ahau e te hunga whakakake.

¹²³Matawaia ana ōku kanohi i te meatanga ki tāu whakaora, ki te kupu hoki o tāu tika.

¹²⁴Kia rite ki tōu aroha tāu mahi ki tāu pononga; whakaakona hoki ahau ki āu tikanga.

¹²⁵He pononga ahau nāu; hōmai he mahara ki ahau, kia mātau ai ki āu whakaaturanga.

¹²⁶Kua rite te wā hei mahinga mā Ihowā; kua whakakāhoretia hoki e rātou tāu ture.

¹²⁷Nā reira i arohaina rawatia ai e ahau āu whakahau i te kōura, āe, i te tino kōura.

¹²⁸Nā reira tika tonu ki ahau āu ako katoa mō ngā mea katoa; kino iho anō ahau ki ngā ara teka katoa.

¹²⁹He mea whakamīharo āu whakaaturanga; i mau ai tōku wairua ki reira.

¹³⁰Ko te whakapuakanga o āu kupu he hōmai mārama; nā reira i hōmai he mahara ki ngā kūware.

¹³¹I hāmama tōku māngai, i kihakiha; he matenui nōku ki āu whakahau.

¹³²Tahuri mai ki ahau, tohungia hoki ahau; kia rite ki tāu hanga ki te hunga e aroha ana ki tōu ingoa.

¹³³Whakatikaia ōku hīkoinga ki runga i tāu kupu; kaua hoki tētahi hē e tukua hei rangatira mōku.

¹³⁴Whakaorangia ahau i te tūkino a te tangata; ā, ka puritia e ahau āu ako.

¹³⁵Kia mārama mai tōu mata ki tāu pononga; whakaakona hoki ahau ki āu tikanga.

¹³⁶Heke noa ngā awa wai o ōku kanohi; mō rātou kāhore i pupuri i tāu ture.

¹³⁷He tika koe, e Ihowā, he tika anō āu whakaritenga.

¹³⁸He tika, he pono rawa āu whakaaturanga i whakahaua mai e koe.

¹³⁹Ka ngaro ahau i tōku ngākau whakapuke, mō āu kupu ka wareware nei i ōku hoariri.

¹⁴⁰Hore rawa he para o tāu kupu; koia i arohaina ai e tāu pononga.

¹⁴¹He iti ahau, e whakahāweatia ana; heoi, kāhore ahau e wareware ki āu ako.

¹⁴²He tika pūmau tonu tōu tika; he pono hoki tāu ture.

¹⁴³Kua pā mai ki ahau te pōuri me te mamae; ko āu whakahau ia tōku oranga ngākau.

¹⁴⁴Pūmau tonu te tika o āu whakaaturanga; hōmai he mahara ki ahau, ā, ka ora ahau.

¹⁴⁵I whakapaua tōku ngākau ki te karanga; whakahokia mai he kupu ki ahau, e Ihowā. Ka mau i ahau āu tikanga.

¹⁴⁶I karanga ahau ki a koe; whakaorangia ahau, ā, ka puritia e ahau āu whakaaturanga.

¹⁴⁷Kīanō te ata i pūao noa, kua karanga ahau; i tūmanako ahau ki āu kupu.

¹⁴⁸I hohoro ōku kanohi i ngā mataaratanga ki te whakaaroaro ki tāu kupu.

¹⁴⁹Whakarongo ki tōku reo, kia rite ki tōu aroha; kia rite, e Ihowā, ki tāu i whakarite ai tāu whakahauora i ahau.

¹⁵⁰E whakatata mai ana te hunga e whai ana i te whanokē; kei tawhiti atu rātou i tāu ture.

¹⁵¹E tata ana mai koe, e Ihowā; he pono katoa āu whakahau.

¹⁵²Nōnamata ahau i mātau ai ki āu whakaaturanga, he mea whakapūmau nāu nō tua whakarere.

¹⁵³Whakaaro mai ki tōku mate, ā, whakaorangia ahau; kāhore hoki ahau e wareware ki tāu ture.

¹⁵⁴Tohea tāku tohe, whakaorangia hoki ahau; kia rite ki tāu kupu tāu whakahauoranga i ahau.

¹⁵⁵Kei tawhiti atu i te hunga kino te whakaoranga; kāhore hoki rātou e rapu ki āu tikanga.

¹⁵⁶E Ihowā, he nui āu mahi tohu; kia rite ki āu whakaritenga tāu whakahauora i ahau.

¹⁵⁷He tokomaha ōku kaitūkino, ōku hoariri, heoi, kāhore ahau i peka kē i āu whakaaturanga.

¹⁵⁸I kite ahau i ngā kaimahi i te kino, ā pōuri iho, nō rātou kāhore e pupuri i tāu kupu.

¹⁵⁹Tirohia mai tōku aroha ki āu ako; kia rite ki tōu aroha, e Ihowā, tāu whakahauora i ahau.

¹⁶⁰Ko te huinga katoatanga o tāu kupu he pono; pūmau katoa anō āu whakaritenga tika ake ake.

¹⁶¹Hore he rawa i tūkinotia ai ahau e ngā rangatira, otiia, e wehi ana tōku ngākau i tāu kupu.

¹⁶²E hari ana ahau ki tāu kupu, ānō he tangata kua whiwhi ki te taonga nui.

¹⁶³E kino ana ahau, e whakarihariha ana ki te kōrero teka; ko tāu ture ia tāku i aroha ai.

¹⁶⁴Takiwhitu āku whakamoemiti ki a koe i te rā tahi mō āu whakaritenga tika.

¹⁶⁵He rangimārie nui tō te hunga e aroha ana ki tāu ture; e kore hoki ō rātou waewae e tūtuki.

¹⁶⁶Ā, kua tūmanako ahau ki tāu whakaora, e Ihowā, kua mahi ahau i āu whakahau.

¹⁶⁷Kua puritia e tōku wairua āu whakaaturanga, āe, e arohaina nuitia ana e ahau.

¹⁶⁸Kua puritia e ahau āu ako me āu whakaaturanga; kei tōu aroaro hoki ōku ara katoa.

¹⁶⁹Tukua atu tāku tangi kia tata atu ki tōu aroaro, e Ihowā; hōmai he mahara ki ahau, kia rite ki tāu kupu.

¹⁷⁰Kia tae atu tāku īnoi ki tōu aroaro; kia rite ki tāu kupu whakaora i ahau.

¹⁷¹Kia whakapuaki ōku ngutu i te whakamoemiti; e whakaako ana hoki koe i ahau ki āu tikanga.

¹⁷²Mā tōku arero e kōrero tāu kupu; he tika hoki āu whakahau katoa.

¹⁷³Kia rite tōu ringa ki te āwhina i ahau; kua whiriwhiria hoki e ahau ko āu ako.

¹⁷⁴Kua matenui ahau ki tāu whakaora, e Ihowā; ko tāu ture hoki tōku oranga ngākau.

¹⁷⁵Kia ora tōku wairua, ā, ka whakamoemiti ia ki a koe; kia āwhinatia hoki ahau e āu whakaritenga.

¹⁷⁶Kua kotiti kē ahau me he hipi ngaro; rapua tāu pononga, kāhore hoki ahau e wareware ki āu whakahau.