Faarfannaa 115

¹Nuuf miti; yaa Waaqayyo, nuuf miti; garuu jaalalaa fi amanamummaa keetiif jedhiitii maqaa keetiif ulfina kenni.

²Saboonni maaliif, “Waaqni isaanii eessa jira?” jedhu?

³Waaqni keenya samii keessa jira; inni waan isa gammachiisu kam iyyuu ni hojjeta.

⁴Waaqonni isaanii tolfamoon garuu meetii fi warqee harka namaatiin hojjetamanii dha.

⁵Isaan afaan qabu; garuu dubbachuu hin dandaʼan; ijas qabu; garuu arguu hin dandaʼan;

⁶gurra qabu; garuu dhagaʼuu hin dandaʼan; funyaan qabu; garuu fuunfachuu hin dandaʼan;

⁷harka qabu; garuu qaqqabachuu hin dandaʼan; miilla qabu; garuu deemuu hin dandaʼan; laagaa isaanii keessattis sagalee tokko illee hin uuman.

⁸Warri isaan tolchan kanneen isaan amanatan hundi akkuma isaanii taʼu.

⁹Yaa mana Israaʼel, Waaqayyoon amanadhu; inni gargaarsaa fi gaachana isaanii ti.

¹⁰Yaa mana Aroon, Waaqayyoon amanadhu; inni gargaarsaa fi gaachana isaanii ti.

¹¹Isin warri isa sodaattan, Waaqayyoon amanadhaa; inni gargaarsaa fi gaachana isaanii ti.

¹²Waaqayyo nu yaadata; nu eebbisas; inni mana Israaʼel ni eebbisa; mana Aroonis ni eebbisa;

¹³inni warra Waaqayyoon sodaatan, xinnaas guddaas ni eebbisa.

¹⁴Waaqayyo, isinii fi ijoollee keessan haa baayʼisu.

¹⁵Waaqayyo samii fi lafa Uume sun isin haa eebbisu.

¹⁶Samiin samiiwwanii oliis kan Waaqayyoo ti; lafa garuu inni namaaf kenneera.

¹⁷Warri duʼan yookaan warri gara iddoo calʼisanitti gad buʼan Waaqayyoon galateeffachuu hin dandaʼan;

¹⁸nu garuu ammaa jalqabnee bara baraan Waaqayyoon ni eebbifna. Haalleluuyaa.