Waiata 115

¹Aua ki a mātou, e Ihowā, aua ki a mātou, engari me hoatu te korōria ki tōu ingoa; whakaaroa tōu aroha, tōu pono.

²Kia mea koia ngā tauiwi; “Kei hea ianei tō rātou Atua?”

³Kei te rangi ia tō mātou Atua; kua meatia e ia ngā mea katoa i pai ai ia.

⁴He hiriwa ā rātou whakapakoko, he kōura, he mahi nā te ringa tāngata.

⁵He māngai ō rātou, ā, kāhore e kōrero; he kanohi ō rātou, ā, kāhore e kite.

⁶He taringa ō rātou, ā, kāhore e rongo: he ihu ō rātou, ā, kāhore e hongi.

⁷He ringa ō rātou, ā, kāhore e whāwhā; he waewae ō rātou, ā, kāhore e haere; kāhore hoki ō rātou korokoro e kōrero.

⁸Ka rite ki a rātou ō rātou kaihanga; āe rā, te hunga katoa anō e whakawhirinaki ana ki a rātou.

⁹E Īharaira, whakawhirinaki ki a Ihowā! Ko ia tō rātou āwhina, tō rātou whakangungu rākau.

¹⁰E te whare o Ārona, whakawhirinaki ki a Ihowā! Ko ia tō rātou āwhina, tō rātou whakangungu rākau.

¹¹E te hunga e wehi ana i a Ihowā, whakawhirinaki ki a Ihowā! Ko ia tō rātou āwhina, tō rātou whakangungu rākau.

¹²Kua mahara a Ihowā ki a tātou; māna tātou e manaaki; māna e manaaki te whare o Īharaira; māna e manaaki te whare o Ārona;

¹³ka manaakitia e ia te hunga e wehi ana ki a Ihowā, te iti, te rahi.

¹⁴Ka tāpiritia anō e Ihowā ki a koutou, ki a koutou tahi ko ā koutou tamariki.

¹⁵He manaakitanga koutou nā Ihowā, nā te kaihanga o te rangi, o te whenua.

¹⁶Ko ngā rangi, he rangi nō Ihowā; ko te whenua ia, he mea hōmai nāna ki ngā tama a te tangata.

¹⁷E kore ngā tūpāpaku e whakamoemiti ki a Ihowā; me te hunga katoa anō e heke ana ki te wahangūtanga.

¹⁸Ko mātou ia ka whakapai ki a Ihowā āianei, ā ake ake. Whakamoemititia a Ihowā!