Waiata 113

¹Whakamoemititia a Ihowā! Whakamoemititia, e ngā pononga a Ihowā; whakamoemititia te ingoa o Ihowā.

²Kia whakapaingia te ingoa o Ihowā āianei ā ake ake.

³Kia whakamoemititia te ingoa o Ihowā i te putanga mai o te rā, ā tae noa ki tōna torengitanga.

⁴Kei runga rawa a Ihowā i ngā iwi katoa; kei runga ake i ngā rangi tōna korōria.

⁵Ko wai te rite ana ki a Ihowā, ki tō tātou Atua, kei runga nei tōna nohoanga,

⁶e whakaiti nei i a ia ki te titiro iho ki ngā mea kei te rangi, kei te whenua?

⁷E whakaara ake ana ia i te iti i roto i te puehu, e whakateitei ake ana i te rawakore i roto i te pūranga paru,

⁸kia whakanohoia ai e ia ki roto ki ngā rangatira, ki ngā rangatira o tāna iwi.

⁹Nāna hoki te pākoko i whai whare ai, hei whāereere e koa ana ki āna tamariki. Whakamoemititia a Ihowā!