Whakatauki 25

¹He whakatauki anō ēnei nā Horomona, he mea tuhi e ngā tāngata a Hetekia kīngi o Hūrā.

²Ko tō te Atua whakakorōria, he huna mea; ko tō ngā kīngi whakakorōria he rapu mea.

³Ko te rangi mō te tiketike, ko te whenua mō te hōhonu, ā, ko te ngākau o ngā kīngi, tē taea te rapu.

⁴Tahia atu te para i te hiriwa, ā, ka puta mai he oko mā te kaitahi para;

⁵tangohia atu te tangata kino i te aroaro o te kīngi, ā, ka ū tōna torōna i runga i te tika.

⁶Kei whakaputa i a koe ki mua i te aroaro o te kīngi, kei tū hoki ki te wāhi o ngā metararahi.

⁷He pai kē hoki kia kīia mai ki a koe, “Haere mai ki runga nei,” i te mea kia whakahokia iho koe ki raro i te aroaro o te rangatira. I kitea nei e ōu kanohi

⁸kei hohoro te haere ki te ngangare, kei kore e kitea e koe tāu e mea ai i tōna mutunga iho, ina meinga koe e tōu hoa kia whakamā.

⁹Tohea tāu tohe ki tōu hoa tonu, ā, kaua e whākina te mea huna a tētahi:

¹⁰kei kohukohutia koe e te tangata i rongo, ā, kore ake tōu ingoa kino e tahuri atu.

¹¹He kupu i tika te kōrero, ko tōna rite kei ngā āporo kōura i roto i ngā kete hiriwa.

¹²He pērā i te whakakai kōura, i te whakapaipai kōura parakore koia anō te ako a te whakaaro nui ki te taringa rongo.

¹³Rite tonu ki te mātao o te hukarere i te kotinga wīti te karere pono ki ōna kaingare; ka ora hoki i a ia te ngākau o ōna ariki.

¹⁴He pērā i ngā kapua me te hau uakore, koia anō te rite o te tangata e whakamanamana ana ki āna hākari horihori.

¹⁵Mā te roa e whakamanawanui ana ka whakaae mai ai te kīngi, ā, mā te arero ngāwari ka mangungu ai te wheua.

¹⁶Kua kitea e koe he honi, kainga ko te wāhi e mākona ai koe; kei kī rawa koe i taua mea, ka ruakina e koe.

¹⁷Kia takitahi tōu waewae ki te whare o tōu hoa; kei hōhā ia ki a koe, ā, ka kino ki a koe.

¹⁸Ko te tangata e whakaatu teka ana mō tōna hoa, he patu ia, he hoari, ā, he pere koi.

¹⁹Ko te whakawhirinaki ki te tangata tinihanga i te wā o te raru, e rite ana ki te niho whati, ki te waewae kua takoki.

²⁰Ko te tangata e waiata ana ki te ngākau pōuri, e rite ana ki te tangata e whakarere ana i te kākahu i te rangi māeke, ki te winika hoki i runga i te hōura.

²¹Ki te matekai tōu hoariri whāngaia ki te taro; ki te matewai whakainumia ki te wai;

²²ka pūrangatia hoki e koe he waro kāpura ki tōna māhunga, ā, ka utua tāu e Ihowā.

²³E mauria ana mai e te hauraro he ua; e pērātia ana hoki e te arero ngautuarā, he kanohi pukuriri.

²⁴He pai kē te noho i te kokonga o te tuanui, i te noho tahi me te wahine ngangare i roto i te whare māhorahora.

²⁵He rongo pai nō te whenua tawhiti, tōna rite kei ngā wai mātao ki te wairua matewai.

²⁶Me te manawa-whenua i takatakahia, me te puna i whakaparuparutia, koia anō te tangata tika e hinga ana i te aroaro o te tangata kino.

²⁷Ehara i te mea pai te kai nui i te honi; waihoki ko ā te tangata rapu i tō rātou ake korōria ehara i te korōria.

²⁸Ko te tangata e kore nei e pēhi i tōna wairua, e rite ana ki te pā kua pakaru, kāhore ōna taiepa.