Whakatauki 24

¹Kei hae koe ki te hunga kino, kaua hoki e hiahia hei hoa mō rātou.

²Ko tā tō rātou ngākau hoki e whakaaro ai, he tūkino, ko tā ō rātou ngutu e kōrero ai, he whanokē.

³Mā te whakaaro nui ka hangā ai te whare, ā, mā te mātauranga ka ū ai.

⁴Mā te mōhio hoki ka kī ai ngā rūma i ngā taonga utu nui katoa, i ngā mea āhuareka.

⁵He kaha te tangata whakaaro nui; āe, e whakanuia ana e te tangata mōhio te kaha.

⁶Nā, kia pai te ngārahu ina anga koe ki te whawhai; kei te tokomaha hoki o ngā kaiwhakatakoto whakaaro te ora.

⁷He tiketike rawa te whakaaro nui mō te wairangi; e kore e kuihi tōna māngai i te kūwaha.

⁸Ko te tangata e whakaaro ana ki te kino, ka kīia he whanokē.

⁹He hara te whakaaro wairangi; he mea whakarihariha anō ki te tangata te tangata whakahī.

¹⁰Ki te ngoikore koe i te rā o te hē, he iti tōu kaha.

¹¹Whakaorangia te hunga e kawea atu ana ki te mate, ā, puritia mai hoki e koe te hunga e meatia ana kia whakamatea.

¹²Ki te mea koe, “Nanā, kīhai tēnei i mōhiotia e mātou”; kāhore ianei te kaipāuna ngākau i te whakaaro ki tērā? Ā, ko te kaitiaki o tōu wairua, kāhore rānei ia e mōhio, e kore rānei e hōmai e ia ki te tangata kia rite ki tāna mahi?

¹³Kainga, e tāku tama, te honi, he pai hoki; me te honikoma, he mea reka hoki ki tōu māngai.

¹⁴Ka mōhio ai koe ki te whakaaro nui, he mea ki tōu wairua; ki te kitea e koe, he tukunga iho anō tōna, e kore hoki tāu i tūmanako ai e hātepea.

¹⁵Kaua, e te tangata kino, e whanga ki te nohoanga o te tangata tika; kei tūkino koe ki tōna takotoranga.

¹⁶E hinga ana hoki te tangata tika, e whitu hinganga, ka ara ake anō; ka whakatakā ia te hunga kino e te hē.

¹⁷Kaua e harakoa ki te hinga tōu hoariri, kaua hoki tōu ngākau e hari ina taka ia;

¹⁸kei kite a Ihowā, ā, ka hē ki tāna titiro, ā, ka tahuri atu tōna riri i a ia.

¹⁹Kei mamae koe, he mea mō ngā kaimahi i te kino, kei hae hoki ki te hunga kino.

²⁰Kāhore hoki he mutunga pai ki te tangata kino; ka keto hoki te rama a te hunga kino.

²¹E tāku tama, e wehi ki a Ihowā, ki te kīngi hoki; ā, kaua e whakauru noa atu ki te hunga e mea ana ki te whakaputa kē.

²²Nō te mea ka puta tata te aituā mō rātou; ā, ko wai ka mōhio ki te whakangaromanga ō rāua tokorua?

²³He whakatauki anō hoki ēnei nā te hunga whakaaro nui: Ehara i te mea pai kia whakaaro ki te kanohi tāngata ina whakawā.

²⁴Ko te tangata e mea ana ki te tangata kino, “He tika koe,” ka kanga ngā iwi ki a ia, ka whakarihariha ngā tauiwi ki a ia.

²⁵Otiia ka koa ngā ngākau o te hunga e rīria ai tōna hē, ka tau iho anō hoki te manaaki pai ki runga ki a rātou.

²⁶Ka kihia e ia ngā ngutu e whakahoki ana i ngā kupu tika.

²⁷Meinga kia takoto pai tāu mahi i waho, kia rite hoki hei meatanga māu i te māra; muri iho ka hanga i tōu whare.

²⁸Kaua koe e tū hei kaiwhakaatu hē mō tōu hoa, i te mea kāhore he take; ā, kaua e tinihanga ki ōu ngutu.

²⁹Kaua e kī, “Ka meatia anō e ahau ki a ia tāna i mea ai ki ahau; ka rite ki tā te tangata mahi tāku e whakahoki ai ki a ia.”

³⁰I haere ahau i te taha o te māra a te māngere, i te taha hoki o te māra wāina a te tangata kāhore ōna mahara;

³¹nā, kua tupuria katoatia e te tātarāmoa, kapi tonu te mata o te māra i te ongaonga, ā, ko tō reira taiepa kōhatu kua oti te wāhi.

³²Kātahi ahau ka titiro, ka āta whakaaroaro; ka kite ahau, ā, ka hopu mai hei ako mōku.

³³Kia iti ake nei te wāhi e parangia ai, kia iti ake nei te moe, kia iti ake te kōtuituitanga o ngā ringa ka moe ai.

³⁴Ka pērā te haerenga mai o tōu mūhore ānō he kaipāhua; o tōu rawakore hoki ānō he tangata mau patu.