Solomona 24

¹MAI kuko oe i ka aoao o na kanaka hewa, Aole makemake hoi e noho pu me lakou.

²No ka mea, noonoo ae la ko lakou naau i ka mea e make ai, A no ka ino hoi ko lakou lehelehe e kamailio ai.

³Ma ke akamai i kukuluia'i ka hale, Ma ka naauao hoi ia i hookupaaia'i.

⁴Na ka ike e hoopihaia'i na keena, I na waiwai a pau, he maikai no a he nani hoi.

⁵O ke kanaka naauao, he ikaika no ia; E mahuahua ana no ka ikaika o ke kanaka ike.

⁶No ka mea, ma ka noonoo nui oe e kaua aku ai, A he ola no ma ka nui o ka poe kukakuka pu.

⁷He kiekie loa ka naauao maluna o ka mea naaupo; Aole e oaka kona waha ma ka ipuka.

⁸O ka mea noonoo e hana hewa aku, E kapaia'ku ia he mea hana kolohe.

⁹O ka manao lapuwale, he hewa ia; A he hoopailua i na kanaka ka mea hoowahawaha.

¹⁰Ina pauaho oe i kou la popilikia, Uuku wale no kou ikaika.

¹¹Ina e hookaulua oe e hoopakele i ka poe i hana paa ia e make, A me ka poe e kokoke ana i ka pepehiia mai;

¹²Ina e i ae oe, E, aole makou i ike; Aole anei e noonoo mai ka mea nana e kaupaona na naau? A o ka mea hoi nana e malama i ka uhane, aole anei oia e ike? Aole anei oia e hoopai i ke kanaka e like me kana hana ana?

¹³E kuu keiki, e ai iho oe i ka meli, no ka mea, he maikai ia; A i ka waihona meli hoi he ono ia i kou waha;

¹⁴Pela hoi ka ike ana i ka naauao i kou uhane; A i loaa ia oe, alaila he hope, A o kou manaolana aole ia e poho.

¹⁵Mai hoohalua, e ke kanaka hewa, ma ka hale o ka mea pono; Mai powa aku oe ma kona wahi e moe ai.

¹⁶No ka mea, ehiku no ka haule ana o ka mea pono, a ala hou mai no; O ka poe hewa, e hina no lakou iloko o ka poino.

¹⁷I ka haule ana o kou euemi, mai hauoli oe, I koua hina ana hoi mai olioli kou naau;

¹⁸O ike mai Iehova he hewa ia i kona mau maka, A e hoohuli oia i kona huhu mai ona aku.

¹⁹Mai ukiuki oe no ka poe hewa, Aole hoi e kuko i ka noho ana o ka poe hana ino.

²⁰No ka mea, aohe uku maikai no ka mea hewa; O ke kukui o ka poe hewa, e pio ana no ia.

²¹E kuu keiki, e makau aku ia Iehova, a me ke alii; Me ka poe lolelua ka naau, mai launa aku.

²²No ka mea, e hiki wawe mai ko lakou poino; A o ka make ana o laua a elua, owai ka mea ike aku?

²³Na ka poe naauao hoi keia mau mea: O ka manao kapakahi ma ka hookolokolo ana, aole i pono ia.

²⁴O ka mea olelo aku i ka mea hewa, He pono no oe; E hoino aku no na kanaka ia ia, E hoowahawaha hoi na lahuikanaka ia ia.

²⁵Aka, he oluolu ko ka poe i ao aku, E hiki mai hoi ia lakou ka pomaikai io.

²⁶E honiia'ku na lehelehe O ka mea olelo aku ma ka pololei.

²⁷Muwaho e hoomakaukau ai i kau hana, A e hooponopono nou iho ma ke kula; A mahope iho, e kukula ae i kou hale.

²⁸Mai liio hala ole oe i hoike ku e i kou hoanoho; Aole hoi e hoopunipuni me kou mau lehelehe.

²⁹Mai olelo oe, E like me ia i hana mai ai ia'u, pela au e hana aku ai ia ia; E hoopai aku au i ke kanaka e like me kana hana ana.

³⁰Ma ke kihapai o ka mea palaualelo i maalo ai au, Ma ka pawaina hoi o ke Kanaka noonoo ole:

³¹Aia hoi, ulu paapu ae la ka puakala, Uhi mai la maluna ona na kakalaioa, O kona pa pohaku hoi, ua hiolo iho la ia.

³²Nana aku la au, halalo iho la ko'u naau; Ike iho la au, a loaa ia'u ke aoia mai.

³³He moe iki ae, he hiamoe iki ae, He pelu hou iki ae i na lima a hiamoe;

³⁴A e hiki mai kou ilihune me he kanaka hele la, A me kou nele e like me ke kanaka kaua.