Whakatauki 14

¹Ko tā te wahine whakaaro nui he hanga i tōna whare; ko tā te wahine wairangi, ko ōna ringa hei wāhi iho.

²Ko te tangata e haere ana i runga i tōna tika, e wehi ana i a Ihowā; ko te tangata he parori kē ōna ara e whakahāwea ana ki a ia.

³Kei te māngai o te wairangi he patu whakapehapeha; mā ngā ngutu ia o te hunga whakaaro nui rātou ka ora ai.

⁴Ki te kāhore he kau, ka mā te takotoranga kai; mā te kaha ia o te kau ka nui ai ngā hua.

⁵E kore te kaiwhakaatu pono e teka; ka puaki ia te teka i te kaiwhakaatu teka.

⁶E rapu ana te tangata whakahī i te whakaaro nui, heoi kāhore e kitea e ia; ki te tangata mātau ia he māmā noa te mātauranga.

⁷Haere atu ki te aroaro o te kūware, ina kāhore e kitea e koe he ngutu mātau ōna.

⁸Ko te whakaaro nui o te tangata tūpato, he mātau ki tōna ara; ko te wairangi o ngā kūware, he tinihanga.

⁹Ko tā ngā wairangi he kata ki te hē; nā, kei te hunga tika te whakaaro pai.

¹⁰E mōhio ana te ngākau ki tōna ake mamae, e kore anō hoki tōna koa e pikitia e te tangata kē.

¹¹Ka whakangaromia te whare o te hunga kino; ka tupu ia te tēneti o te hunga tika.

¹²He huarahi anō tērā e tika ana ki tā te tangata titiro, ko tōna mutunga ia ko ngā huarahi ki te mate.

¹³Ahakoa e kata ana, e mamae ana te ngākau; ā, ko te mutunga o te koa, he pōuri.

¹⁴Ko te tangata i te ngākau tahuri kē, ka mākona i ōna ara ake; ā, ko te tangata pai ka mākona i tāna ake anō.

¹⁵Ko tā te kūware he whakapono ki ngā kupu katoa; tēnā ko te tangata tūpato, ka āta titiro ki tāna hīkoi.

¹⁶E wehi ana te tangata whakaaro nui, ka neke atu i te kino; ko te kūware ia ka whakahī, ka tohe.

¹⁷Ko te tangata riri wawe ka mahi i te wairangi; ka kinongia anō hoki te tangata i ngā rauhanga kino.

¹⁸He wairangi te whakarerenga iho mō ngā kūware; ko te tangata tūpato ia ka karaunatia ki te mātauranga.

¹⁹E piko ana te hunga kino ki te aroaro o te hunga pai; ā, ko te hunga hē ki ngā kūwaha o te tangata tika.

²⁰E kinongia ana te rawakore e tōna hoa ake nei anō; he tokomaha ia ngā tāngata e aroha ana ki te tangata taonga.

²¹Ko te tangata e whakahāwea ana ki tōna hoa, e hara ana; ko te tangata ia e atawhai ana ki ngā rawakore, ka hari.

²²He teka ianei e kotiti kē ana ngā kaiwhakatakoto i te kino? He atawhai ia, he pono, kei ngā kaihanga i te pai.

²³He hua tō ngā māuiuitanga katoa; tēnā ko te kōrero o ngā ngutu e ahu ana ki te rawakore.

²⁴Hei karauna mō ngā whakaaro nui ō rātou taonga; ko te wairangi ia o ngā kūware, he wairangi kau.

²⁵Ka ora ngā wairua i te kaiwhakaatu pono; ko te tangata kōrero teka ia e mea ana kia tinihanga.

²⁶Ū tonu, kaha tonu te whakaaro ina wehi ki a Ihowā; ka whai rerenga atu anō hoki āna tamariki.

²⁷He puna ora te wehi ki a Ihowā, e mahue ai ngā reti o te mate.

²⁸Mā te nui o te iwi ka whai hōnore ai te kīngi; mā te kore o te iwi ka taka ai te rangatira.

²⁹He mātauranga nui tō te tangata manawanui; ko te tangata riri wawe ia, e whakaneke ake ana ia i te wairangi.

³⁰He ora ki ngā kikokiko te ngākau ora; ko te hae ia, he pirau ki ngā wheua.

³¹Ko te tangata e tūkino ana i te ware, he tāwai tāna ki tōna Kaihanga; ko te tangata ia e atawhai ana i te rawakore, e whakahōnore ana i a ia.

³²E uakina iho ana te tangata kino i runga i tōna hē; ko te tangata tika ia ka whai tūmanakohanga i tōna matenga.

³³Ka noho te whakaaro nui ki te ngākau o te tangata mātau; engari ko te mea kei te wāhi ki roto o ngā kūware e whakaaturia ana.

³⁴Mā te tika ka kake ai te iwi; mā te hara ia ka ingoa kino ai ngā iwi.

³⁵Ka manako te kīngi ki te pononga mahara; ā, ka riri ki te tangata i takea ai te whakamā.