Hopa 39

¹“E mōhiotia ana rānei e koe te wā e whānau ai ngā koati mohoao o te kāmaka? E kitea pūtia ana rānei e koe te wā e whakamamae ai ngā hāta?

²E taua anō rānei e koe ngā marama e rite ana i a rātou? E mōhio ana rānei koe ki te wā e whānau ai rātou?

³Tuohu ana rātou, kua puta mai ā rātou kūao, ākiritia mai ana e rātou ō rātou mea whakapōuri.

⁴E pai ana te āhua o ā rātou kūao, e tupu ana i te pārae; ka haere atu rātou, ā, kāhore e hoki mai anō.

⁵“Nā wai i tuku te kāihe mohoao kia haere noa atu; ngā here o te kāihe mohoao, nā wai i wewete?

⁶Ko te whare i whakaritea nei e ahau mōna, ko te koraha; ko ōna nohoanga ko te wāhi tītōhea.

⁷Whakahāweatia iho e ia te ngangau o te pā; e kore ia e rongo ki te reo o te kaiakiaki.

⁸Ko tōna wāhi kai kei te tuahiwi o ngā maunga, e rapua ana e ia ngā mea matomato katoa.

⁹“E pai rānei te unikanga kia mahi ki a koe? Kei tāu takotoranga kai rānei he moenga mōna?

¹⁰E herea rānei e koe te unikanga ki tōna taura i te awa parautanga? E rakarakatia rānei e ia ngā raorao me tāna whai anō i a koe?

¹¹E whakawhirinaki atu rānei koe ki a ia, nō te mea e nui ana tōna kaha? E whakarērea atu rānei e koe tāu mahi māna?

¹²E whakapono atu rānei koe māna āu hua e whakahoki mai; māna e kohikohi mai ki tāu patunga wīti?

¹³“E whakamanamana ana te parirau o te otereti; otirā he atawhai anō rānei tā ōna hou, tā ōna raukura?

¹⁴E whakarērea ana e ia ōna hua ki te whenua, whakamahanatia iho e ia ki te puehu,

¹⁵wareware ake ia tērā pea e pēpē i te waewae, e takahia rānei e te kīrehe o te pārae.

¹⁶He mea pakeke ia ki āna pī, me te mea ehara i a ia; ahakoa ka maumauria tāna mahi, kāhore ōna manawapā;

¹⁷nō te mea i whakakāhoretia e te Atua he ngākau mahara mōna, kīhai hoki i hōmai he whakaaro ki a ia.

¹⁸I te wā e maranga ai ia ki runga, whakahāweatia iho e ia te hōiho rāua ko tōna kaieke.

¹⁹“Nāu rānei i hoatu tōna kaha ki te hōiho? Nāu rānei tōna kakī i whakakākahu ki te huruhuru?

²⁰Nāu rānei ia i mea kia pekepeke, kia pērā me te māwhitiwhiti? He hanga whakawehi te korōria o tōna whewhengu.

²¹E hūkari ana ia i te raorao, me te koa anō ki tōna kaha; tika tonu ia ki te hunga mau patu.

²²Whakahāwea ana ia ki te wehi, kāhore ōna mataku; e kore anō ia e nunumi mai i te hoari.

²³Papā ana te papa pere ki tōna taha, te tao e rarapa ana, me te tīmata.

²⁴E horomia ana e ia te whenua, me te ngangau me te riri; kāhore ia i te whakapono ko te reo tērā o te tētere.

²⁵Ka tangi ana te tētere ka mea ia, ‘Ha, ha!’ I tawhiti anō ka hongia e ia te pakanga, te whatitiri o ngā rangatira, me te hāmama.

²⁶“He mōhio nōu i rere ai te kāhu, i roha ai i ōna parirau, i anga ai whaka te tonga?

²⁷Nāu te kupu i kake ai te ēkara? I hangā ai e ia tāna ōhanga ki te wāhi tiketike?

²⁸Noho ana ia i runga i te kāmaka, kei reira tōna kāinga, kei te kāmaka keokeo, kei te pā kaha.

²⁹Ā, rapua ana e ia he kai i reira; e kite atu ana ōna kanohi i tawhiti.

³⁰Horomititia ake ana hoki ngā toto e āna pī; ā, ko te wāhi i ngā tūpāpaku, kei reira anō ia.”