Yobu 36

¹Eriku ne yeeyongera okwogera nti,

²“Yongera okuŋŋumiikirizaako katono nkulage, nkyalina bye nnina okwogera ebifa ku Katonda.

³Amagezi ge nnina gava wala, era mmanyi nga Omutonzi wange alamula mu bwenkanya.

⁴Eky’amazima ebigambo byange si bikyamu, oyo akakasa by’amanyi y’ayogera naawe.

⁵“Laba, Katonda wa buyinza, tanyooma bantu; w’amaanyi, anywerera ku bigendererwa bye.

⁶Talamya bakozi ba bibi, era awa ababonyaabonyezebwa ebibasaanira.

⁷Taggya maaso ge ku batuukirivu, abatuuza ku ntebe ey’obwakabaka n’abagulumiza emirembe n’emirembe.

⁸Naye abantu bwe baba basibiddwa enjegere nga banywezeddwa n’emiguwa egy’okulumwa

⁹n’abategeeza ensobi zaabwe, n’okwonoona kwabwe, nti, beewaggudde,

¹⁰aggula amatu gaabwe bawulirize okunenyezebwa n’abalagira beenenye ekibi kyabwe.

¹¹Bwe bamugondera ne bamuweereza, ennaku zaabwe zonna balizimala mu kwesiima, era n’emyaka gyabwe mu kusanyuka.

¹²Naye bwe batamugondera, baalizikirizibwa n’ekitala, bafe nga tebalina magezi.

¹³“Ab’emitima egitatya Katonda baba n’obukyayi. Ne bw’abasiba, tebamukaabirira abasumulule.

¹⁴Bafiira mu buvubuka bwabwe era obulamu bwabwe buzikiririra mu basajja abenzi.

¹⁵Anunula anyigirizibwa mu kubonaabona kwe, n’aggula okutu kwe mu kujoogebwa kwe.

¹⁶“Akusendasenda okukuggya mu kamwa k’okubonaabona, akuteeke mu kifo ekigazi ekitaliimu kuziyizibwa, omanye emirembe gy’emeeza yo ejjudde emmere ennungi.

¹⁷Naye kaakano weetisse omugugu ogw’okusalirwa omusango abakozi b’ebibi gwe basaanira; okusalirwa omusango n’obwenkanya byakunyweza.

¹⁸Weegendereze oleme kukkiriza kusendebwasendebwa; obunene bw’enguzi buleme okukukyamya.

¹⁹Obugagga bwo oba okufuba kwo kwonna binaakuyamba okukuggya mu buyinike?

²⁰Teweegomba budde bwa kiro olyoke owalule abantu okuva mu bifo byabwe.

²¹Weegendereze oleme kukola bitali bya butuukirivu, by’osinga okwagala okukira okubonyaabonyezebwa.

²²“Laba Katonda yagulumira mu maanyi ge; ani ayigiriza nga ye?

²³Ani eyali amukubidde amakubo, oba okumugamba nti, ‘Ky’okoze si kituufu?’

²⁴Jjukira ng’oteekwa okugulumizanga emirimu gye, abantu gye bayimba mu nnyimba.

²⁵Abantu bonna baagiraba, omuntu agirengerera wala.

²⁶Laba, Katonda agulumizibwe! Assukiridde okutegeera kwaffe; obungi bw’emyaka gye tebunoonyezeka.

²⁷“Kubanga akuŋŋaanya amatondo g’amazzi, agafuuka enkuba etonnya mu bugga;

²⁸ebire bivaamu amazzi gaabyo, enkuba n’ekuba abantu.

²⁹Ani ayinza okutegeera engeri gy’asaasaanyamu ebire, okubwatuka okuva ku kituuti kye?

³⁰Laba, asaasaanya okumyansa kw’eggulu, era n’abikka obuziba bw’ennyanja.

³¹Eyo y’engeri gy’afugamu amawanga, n’agawa emmere mu bungi.

³²Emikono gye agijjuza eraddu, n’agiragira ekube ebifo bye yeerondeddemu.

³³Okubwatuka kwayo kulangirira kibuyaga ajja, n’ente ne zirangirira okujja kwayo.”