Hopa 35

¹I kōrero anō a Erihu, i mea:

²“Ki tōu whakaaro he tika tēnei māu, e mea ana rānei koe, ‘Nui atu tōku tika i tō te Atua?’

³I mea ai koe, ‘He aha te rawa ki a koe?’ ā, ‘He aha te painga ki ahau, hira ake i te painga me i hara ahau?’

⁴“Māku e whakahoki he kupu ki a koe, ki a koutou ko ōu hoa.

⁵Kia matatau atu tāu titiro ki ngā rangi; mātakitakina atu hoki ngā kapua e tiketike ake nā i a koe.

⁶Mehemea kua hara koe, ka ahatia ia e tāu mahi? Ā, ki te whakanuia āu mahi tutū, e aha ana rānei koe ki a ia?

⁷Ki te mea he tika tōu, ko te aha e hoatu ana e koe ki a ia? Ko te aha rānei a tōu ringa e riro ana i a ia?

⁸Ka mamae pea tētahi tangata pēnā i a koe nā i tōu kino; ka whai painga pea ki tētahi tama a te tangata tōu tika.

⁹“He maha nō ngā tūkinotanga i tangi ai rātou; nā te ringaringa o te hunga nui i auē ai rātou kia āwhinatia.

¹⁰Kāhore ia tētahi e mea ana, ‘Kei hea tōku Kaihanga, te Atua, e hōmai nei i ngā waiata i te pō?

¹¹E nui atu nei tāna whakaako ki a tātou i tāna ki ngā kararehe o te whenua, nāna hoki i nui ai ō tātou mahara i o ngā manu o te rangi?’

¹²Karanga ana rātou i reira, heoi kāhore he kupu e whakahokia mai, he mea nā te whakapehapeha o te hunga kino.

¹³He pono e kore te tekateka noa e whakarangona mai e te Atua, e kore anō hoki e tirohia mai e te Kaha Rawa.

¹⁴Ka iti rawa iho ki te mea koe, kāhore koe e kite i a ia, kei tōna aroaro te whakarite whakawā; nā, ka tatari koe ki a ia!

¹⁵Nā, kīhai nei ia i tae mai i runga i tōna riri, kīhai anō hoki i aro nui mai ki te whakamanamana;

¹⁶koia i puaki ai te māngai o Hopa, he mea horihori kau nei; kāhore he mātauranga o ngā kupu e whakamahatia nei e ia.”