Jobho 16

¹Ipapo Jobho akapindura akati:

²“Ndakanzwa zvinhu zvakawanda sezvizvi; mose muri vanyaradzi pasina!

³Ko, kutaura kwenyu kwamadzokorora kwenguva refu hakuperiwo here? Chii chinokurwadzai kuti murambe muchiita nharo?

⁴Neniwo ndaigona kutaura semi, dai imi manga muri pachinzvimbo changu; ndaigona kutaura mashoko okukupikisai uye ndigokudzungudzirai musoro wangu.

⁵Asi muromo wangu waizokukurudzirai: kunyaradza kunobva pamuromo wangu kwaizokuvigirai zororo.

⁶“Asi kana ndikataura, kurwadziwa kwangu hakuperi; uye kana ndikanyarara, iko hakubvi.

⁷Zvirokwazvo, imi Mwari, mandipedza simba; maparadza imba yangu yose.

⁸Makandisunga ini, uye chava chapupu; kuondoroka kunondiwira uye kunopupurira zvinondirwisa.

⁹Mwari anondirova uye anondibvambura mukutsamwa kwake, uye anondirumanyira meno ake; mudzivisi wangu anondidzvokorera meso ake anobaya.

¹⁰Vanhu vanoshamisa miromo yavo kuti vandiseke; vanondirova padama pakundimhura kwavo, uye vanobatana pamwe chete kuzondirwisa.

¹¹Mwari akandidzorera mumaoko avanhu vakaipa, uye akandikanda mumaoko avakashata.

¹²Zvose zvakanga zvakanaka hazvo kwandiri, asi iye akandivhuna; akandibata napahuro akandipwanya-pwanya. Akandivavarira;

¹³vapfuri vake vemiseve vakandikomba. Anobaya itsvo dzangu asina tsitsi, uye anodururira nduru yangu pasi.

¹⁴Nguva nenguva anondirwisa; anondidzingirira somurwi.

¹⁵“Ndakasona nguo dzamasaga kuti ndifukidze ganda rangu, uye ndaviga huma yangu muguruva.

¹⁶Chiso changu chatsvuka nokuchema, rima guru rakomberedza meso angu;

¹⁷asi zvazvo maoko angu haana kuita chisimba, uye munyengetero wangu wakachena.

¹⁸“Iwe nyika, rega kufukidza ropa rangu; kuchema kwangu ngakurege kuwana zororo!

¹⁹Kunyange iko zvino chapupu changu chiri kudenga; murevereri wangu ari kumusoro.

²⁰Murevereri wangu ndiye shamwari yangu, meso angu paanodurura misodzi kuna Mwari;

²¹anomira pachinzvimbo chomunhu achikumbira kuna Mwari, somunhu anokumbirira shamwari yake.

²²“Makore mashoma bedzi asara, ndisati ndaenda parwendo rusingadzokwi.