इय्योब 12

¹मग इय्योबाने उत्तर दिले,

²“खचितच तुम्हीच ते विशिष्ट लोक आहात, आणि ज्ञान तुमच्याबरोबरच नाहीसे होईल!

³परंतु मलाही तुमच्यासारखी बुद्धी आहे; मी तुमच्यापेक्षा कमी दर्जाचा नाही. या सर्वगोष्टी कोणाला ठाऊक नाहीत?

⁴“मी माझ्या मित्रांच्या चेष्टेचा विषय बनलो आहे, मी परमेश्वराचा धावा केला आणि त्यांनी मला उत्तर दिले— नीतिमान आणि निर्दोष असूनही मी केवळ चेष्टेचा विषय झालो आहे!

⁵सुखी मनुष्याला विपत्तीचा तिरस्कार वाटतो; मात्र ज्यांचे पाय घसरतात त्यांच्यावर ती वार करते.

⁶हिंसकांचे डेरे सुरक्षित असतात, आणि जे परमेश्वराला चेतावणी देतात ते निर्भय राहतात— ते आपल्या हातच्या सामर्थ्याला आपला देव समजतात.

⁷“परंतु प्राण्यांना विचार, ते तुला शिकवतील, किंवा आकाशातील पाखरे तुला सांगतील;

⁸अथवा पृथ्वीशी बोलावे आणि ती तुला शिकवेल; किंवा सागरातील माशांनी तुला माहिती देऊ दे.

⁹या सर्वापैकी कोणासही ठाऊक नाही का की याहवेहच्या हाताने हे केले आहे?

¹⁰कारण प्रत्येक प्राण्याचा जीव, आणि सर्व मानवजातीचा श्वास त्यांच्याच हातात आहे.

¹¹जशी अन्नाची चव जिभेला समजते, तशीच शब्दांची पारख कान करीत नाहीत का?

¹²वयस्कांमध्ये ज्ञान आढळून येते की नाही? दीर्घ आयुष्याने समज येते की नाही?

¹³“ज्ञान आणि सामर्थ्य हे परमेश्वराचे आहेत; सल्ला आणि समज त्यांचेच आहे.

¹⁴ते जे पाडतात, ते पुन्हा बांधता येत नाही; ते ज्याला बंदिवासात पकडतात, त्याला सुटका नाही.

¹⁵परमेश्वराने जर पाऊस रोखून धरला, तर दुष्काळ पडतो; आणि त्याला मोकळे सोडले, तर पृथ्वी उद्ध्वस्त होते.

¹⁶पराक्रम आणि शहाणपण ही त्यांची आहेत; फसणारे आणि फसविणारे दोन्हीही त्यांचेच आहेत.

¹⁷ते मंत्र्यांना विवस्त्र करतात आणि न्यायाधीशांना मूर्ख ठरवितात.

¹⁸राजांनी टाकलेली बेडी ते तोडून टाकतात आणि त्यांच्या कंबरेस लंगोट बांधतात.

¹⁹ते याजकांना अनवाणी चालावयास लावतात स्थिर झालेल्या अधिकार्‍यांना ते उलथून टाकतात.

²⁰विश्वासू सल्लागारांची तोंडे ते बंद करतात आणि वडीलजनांचा विवेक काढून घेतात.

²¹ते सरदारांवर तिरस्कार ओततात, आणि सबळांना दुर्बल करतात.

²²ते अंधारातील गुप्त गोष्टी प्रकट करतात आणि घोर अंधकाराला प्रकाशाने उजळून टाकतात.

²³ते राष्ट्रांना महान करतात आणि त्याचा नाशही करतात; ते राष्ट्रे विस्तृत करतात आणि त्यांचा नायनाट करतात.

²⁴ते पृथ्वीवरील अधिकार्‍यांची बुद्धी काढून घेतात; आणि त्यांना दिशाहीन असे भटकण्यास लावतात.

²⁵ते अंधारात प्रकाशाविना चाचपडतात; त्यांना मद्यपीसारखे लटपटण्यास लावतात.