Esayi 32

¹Buur a ngii, dëgg lay nguuroo, jawriñ ñi it, yoon lañuy yilifee;

²ku ci nekk mel ni seelukaayu ngelaw, di kiiraay ci ngëlén, mel ni wali ndox ci suuf su ne sereŋ, mbaa keppaaru doj wu mag ci àll bu mar.

³Su boobaa gëti njàccaar yi dootuñu gëmm, te noppi ñiy dégg dañuy teewlu,

⁴ku yàkkamti di ràññee, ba mana xam, làmmiñu ku dër gaawa wax lu leer.

⁵Booba deesatul woowe ab dof «gor si», te njublaŋ dootul dégg «ku tedd ki».

⁶Ab dof, waxi dof lay wax, xel ma di nas ñaawtéef, mu nar jëf ju teddadi. Lu ñaaw lay wax, jëme ci Aji Sax ji, di xiifal ku xiif, di xañ ku mar lu mu naan.

⁷Ab njublaŋ, ay pexeem musiba la. Njekkar lay nas, ba bu néew-ji-doole sàkkoo dëgg it, mu fen ba lor ko.

⁸Waaye gor si, ngor lay mébét, te ngor lay wéye.

⁹Yeen jigéen ñi dal xel, taxawleen temm, déglu ma; yeen janq ji féex, teewluleen ma.

¹⁰Yeen jigéen ñi dal xel, fi leek at aki fan ngeen jàq; witt mi du baax, ngóob du taxaw.

¹¹Jigéen ñi dal xel, ragalleen; yeen ñi féex laa ne, tiitleen! Futtikuleen, ba ne duŋŋ; gembooy saaku, ñaawloo.

¹²Fëggleen seen dënn, jooy tooli bànneex ya, jooyleen reseñ ju nangu ja,

¹³ak sama suufas bokk ya ay dég aki dagg nangu. Jooyleen kay kër ya ca mbégte ma, ak dëkk bu xumb ba.

¹⁴Kër gu rafet sax, dees koy wacc, dëkk baak riiram, dees koy dëddu; tund ak tóoju doon ay xunt ba fàww, mbaamu àll ne ca finaax, jur ga di ca fore,

¹⁵ba keroog Boroom bi ëf ci nun ag noowam, màndiŋ mi soppalikub tóokër, tóokër meññ, ba ñu ne ab gott la.

¹⁶Su boobaa yoon dëkke màndiŋ mi, dëgg tooge tóokër bi.

¹⁷Su boobaa àtteb dëgg ay jur jàmm, àtteb yoon di dalal tey aare ba fàww,

¹⁸ba sama bokk yi dëkke sancub jàmm, ci dëkkuwaay yu wóor, ci dalluwaay yu dal xel,

¹⁹doonte gott bi day daanu ci tawub doji yuur, dëkk bi detteelu ba ne dett.

²⁰Waaye ndokkalee yeen ñi tala ji fépp fuy ndox te saña afal nag ak mbaam.