1Nanā, ka kīngi te kīngi i runga i te tika, ka whakahaere tikanga anō ngā rangatira i runga i te whakawā.
2Ā, ka ai he tangata hei kuhunga ina pā te hau, hei piringa kei mate i te tūpuhi; ka rite ki ngā awa wai i te wāhi maroke, ki te ata o te kōhatu nui i te whenua ngaunga rā.
3Nā, e kore e atarua ngā kanohi o te hunga kite; ka whakarongo anō te hunga i te taringa rongo.
4Ka mātauria anō te mātauranga e te ngākau o te hunga pōnānā, ā, ka hohoro te arero o ngā reo kīkiki ki te kōrero mārama.
5E kore te wairangi e kīia i muri he ohaoha, e kore anō te kaiponu e kīia he atawhai.
6Ka kōrero hoki te tangata nanakia i te nanakia, ā, ka mahi tōna ngākau i te kino, kia whakahāwea ai ki te tapu, kia puta kē ai tāna kōrero ki a Ihowā, kia noho tahanga ai i a ia te wairua o te tangata matekai, kia mōtī ai hoki he wai mō te tangata matewai.
7He kino hoki ngā hanga a te kaiponu; e whakatakotoria ana e ia he whakaaro kino, he kōrero teka e hē ai te hunga iti, ahakoa e tika ana anō ngā kōrero a te rawakore.
8He ohaoha ia ngā tikanga a te ohaoha; ā, ka ū ia ki ngā mahi ohaoha.
9Whakatika e ngā wāhine e noho pai ana, whakarongo ki tōku reo; e ngā tamāhine whakaarokore, kia whai taringa, ki āku kupu.
10He maha ngā rā i tua atu i te tau e raruraru ai koutou, e ngā wāhine maharakore; nō te mea ka kore te whakinga wāina, e kore hoki e tae mai te kohikohinga.
11E wiri, e ngā wāhine e noho hūmārie ana; pōkaikaha noa iho, e te hunga maharakore; whakarērea ngā kākahu, noho tahanga, whītikiria he kākahu taratara ki ō koutou hope.
12Ka papaki rātou ki ngā uma mō ngā māra ātaahua, mō te wāina hua,
13ka puta ake te tātarāmoa me te tūmatakuru ki te oneone o tāku iwi, inā, ki runga ki ngā whare koa katoa o te pā hari.
14Nō te mea ka mahue te whare kīngi, ka whakarērea te pā tokomaha; ko te puke me te pourewa ka waiho hei ana ā ake ake, hei mea e koa ai ngā kāihe mohoao, hei wāhi kai mā ngā kāhui;
15kia ringihia mai rā anō i runga te wairua ki a tātou, kia meinga rā anō te koraha hei māra whai hua, kia kīia anō te māra whai hua he ngahere.
16Ko reira te whakawā noho ai ki te koraha, ā, hei kāinga te māra hua mō te tika.
17Ā, ko te mahi a te tika he rongo mau; ko te whakaotinga o te tika he āta noho, he ngākau ū ā ake ake.
18Ka noho hoki tāku iwi ki te nohoanga o te rongo mau, ki ngā kāinga e ū ai te ngākau, ki ngā okiokinga hūmārie.
19Ka tārere iho ia te whatu i te hinganga o te ngahere; ā, ka whakahoroa rawatia te pā ki raro.
20Anō te hari o koutou, o te hunga e whakatō ana ki te taha o ngā wai katoa, e tuku atu ana i ngā waewae o te kau, o te kāihe.