Ose 12

¹Efrayim mooy sàmmkatub ngelaw, yendoo topp ngelawal penku, di yokki fen ak fitna, fasoo kóllëre ak Asiri, yónnee yóbbalu diw ba Misra.

²Aji Sax ji moo séq ak Yuda ab layoo, mooy mbugale Yanqóoba ay jëfinam, añale ko ay jëfam.

³Ci biiru ndeyam la kii suufoo ab seexam; kii moo tollu ci dooleem, bëreek Yàlla.

⁴Kee bëreek malaaka, ba génn ca, kee jooy di sàkku aw yiwam. Fa Betel la ko fekk, te foofa la Yàlla waxeek nun.

⁵Aji Sax ji Yàlla Boroom gàngoor yi, Aji Sax jee di turu bàkkam.

⁶Yaw nag, ca sa Yàlla nga wara dellu, ngor ak njub, sàmm ko, te nga saxoo yaakaar sa Yàlla.

⁷Ni Kanaaneen biy jula, ni la Efrayim yore màndaxekaayu njublaŋ cib loxoom, bëgga naxe.

⁸Efrayim a ngi naan: «Woomle naa, maa amal sama bopp alal, te mboolem samaw ñaq, giseesu ci tooñaange ju di bàkkaar.»

⁹«Man Aji Sax ji dale di sa Yàlla ca Misra, maa lay dëëlaat ciy xayma, na woon ca bésub ndaje.

¹⁰Maa wax ak yonent yi, yokk peeñu yi, te yonent yi, maa leen léeb ay misaal.»

¹¹Su Galàdd dee dëkkub defkati ñaawtéef, dañoo tekkiwul dara. Fa Gilgal lees di rendee ay saraxi yëkk, te seeni sarxalukaay ni jali xeer lay mel ci ay tooboy tool.

¹²Yanqóobaa dawoon ba réewum Siri, Israayil laa ne, moo liggéey ngir am jabar, wut jabar tax koo sàmm ag jur.

¹³Ci loxol yonent la Aji Sax ji génnee Israayil Misra, te ab yonent la sàmmloo Israayil.

¹⁴Waaye Efrayim moomoo ko merloo, naqaral ko. Deret ji mu tuur la Boroomam di këpp ci kawam, añub tooñam la koy fey.