Waiata a Horomona 3

¹I te pō, i runga i tōku moenga, i rapua e ahau tā tōku wairua i aroha ai; i rapua e ahau, heoi kīhai i kitea.

²Ka mea ahau, “Ka whakatika ahau āianei, ka kōpikopiko i roto i te pā, i ngā huarahi, i ngā waharoa, ka rapu i tā tōku wairua i aroha ai.” Rapua ana ia e ahau, heoi kīhai i kitea.

³I tūtaki ki ahau ngā kaitiaki e kōpikopiko nei i roto i te pā. “Anō rā ko ahau ki a rātou, i kite rānei koutou i tā tōku wairua e aroha nei?”

⁴Pahemo kau atu rātou, kua tūtaki ahau ki tā tōku wairua e aroha nei. Kei te pupuri ahau i a ia, kīhai hoki ia i tukua atu e ahau, ā kawea noatia atu ia e ahau ki te whare o tōku whaea, ki te rūma o te wahine i whānau ai ahau.

⁵He kī tēnei nāku ki a koutou, e ngā tamāhine o Hiruhārama, i te aroaro o ngā anaterope, o ngā hāta o te pārae: kaua e whakaoho, kaua e whakaara i tāku e aroha nei, kia pai rā anō ia.

⁶Ko wai tēnei e whakaputa mai nei i te koraha, ānō ko ngā pou paowa, kakara tonu i te maira, i te parakihe, i ngā puehu katoa a te kaihoko?

⁷Nanā, ko te amo o Horomona; e toru tekau ngā tāngata mārohirohi i tētahi taha, i tētahi taha, nō ngā mārohirohi o Īharaira.

⁸He hunga mau hoari rātou katoa, he mea whakaako ki te whawhai; kei tōna hūwhā anō te hoari a tēnei, a tēnei, i te wehi hoki i te pō.

⁹I hangā e Kīngi Horomona he amo mōna, nō Repanōna te rākau.

¹⁰Ko ōna pou i hangā e ia ki te hiriwa, he kōura a raro, he pāpura tōna nohoanga, he mea whāriki a waenganui ki te aroha, nō ngā tamāhine o Hiruhārama.

¹¹Haere, e ngā tamāhine o Hiona, ka mātakitaki i a Kīngi Horomona, me te karauna anō i karaunatia ai ia e tōna whaea i te rā o tōna mārenatanga, i te rā hoki i koa ai tōna ngākau.