Faarfannaa 91

¹Namni daʼoo Waaqa Waan Hundaa Olii keessa jiraatu, gaaddisa Waaqa Waan Hunda Dandaʼu sanaa jala boqota.

²Anis Waaqayyoon, “Inni iddoo ani itti kooluu galuu fi daʼannoo koo ti; Waaqa koo kan ani amanadhuu dha” nan jedha.

³Inni dhugumaan kiyyoo adamsaa jalaa, dhukkuba nama fixu jalaas si baasa.

⁴Inni baallee isaatiin si dhoksa; atis qoochoo isaa jalatti kooluu ni galta; amanamummaan isaa gaachanaa fi dallaa eegumsaa siif taʼa.

⁵Atis naasuu halkanii, yookaan xiyya guyyaan futtaafamu hin sodaattu;

⁶golfaa dukkana keessa deemu, yookaan dhaʼicha guyyaa saafaan nama balleessu hin sodaannu.

⁷Kumni tokko si cinatti, kumni kudhan immoo mirga keetti ni kufa; garuu sitti hin dhiʼaatu.

⁸Ati ijuma kee qofaan ilaalta; adaba hamootatti dhufus ni argita.

⁹Ati waan Waaqayyoon iddoo kooluu itti galtu, Waaqa Waan Hundaa Olii iddoo jireenya keetii godhatteef,

¹⁰wanni hamaan si hin tuqu; dhaʼichis dunkaana keetti hin dhiʼaatu.

¹¹Inni akka isaan karaa kee hunda irratti si eeganiif, ergamoota isaa siif ni ajaja;

¹²isaanis akka miilla keetiin dhagaatti hin buuneef harka isaaniitiin ol si fuudhu.

¹³Ati leencaa fi buutii irra ejjetta; leenca saafelaa fi jawwee ni dhidhiitta.

¹⁴Waaqayyos akkana jedha; “Sababii inni na jaallatuuf, ani isa nan oolcha; waan inni maqaa koo beekuuf isa nan eega.

¹⁵Inni na waammata; anis nan deebisaaf; rakkina keessatti ani isa wajjin nan taʼa; isa nan oolcha; ulfinas nan kennaaf.

¹⁶Ani umurii dheeraa isa nan quufsa; fayyisuu koos isatti argisiisa.”