Taalifi cant 84

¹Mu jëm ci njiital woykat yi, ànd ak xalam gu ñuy wax gitiit, ñeel askanu Kore wu góor. Aji Sax ji Boroom gàngoor yi, yaaka sopplub dëkkuwaay!

²Damaa namm ëttub Aji Sax ji, di ko gelu ba jeex tàkk, jëmm jeek xol bi, di xaacul Yàlla jiy dund.

³Éy Aji Sax ji Boroom gàngoor yi, sama buur, sama Yàlla, sawoor sax tag, nga fat ko, mbelaar it sàkk tàggam, denc ay cuujam fa sa sarxalukaay.

⁴Ndokkalee ku dëkke sa kër, di la màggalati. Selaw.

⁵Ndokkalee ku lay doolewoo, te namma topp yoon ya jëm sa kër.

⁶Buy jàll xuru Jooyoo, mu saf ko bëti ndox, céebo sànge xur wa barke,

⁷muy gëna am doole, ba teewi fa Yàlla ca Siyoŋ.

⁸Éy Yàlla Aji Sax ji Boroom gàngoor yi, déglul, ma ñaan la! Yàllay Yanqóoba, teewlu ma. Selaw.

⁹Éy Yàlla, geesul Buur, sunu kiiraay, ngalla niiral kii nga fal.

¹⁰Benn fan ci sab ëtt de moo dàq junniy fan feneen. Sama taxawaayu bunt kër Yàlla moo ma gënal tëraayu biir xaymab ku bon.

¹¹Aji Sax ji Yàllaa mat jant, mat kiiraay; yiw ak daraja, Aji Sax ji joxe; te du ngëneel lu muy bañal ku mat.

¹²Éy Aji Sax ji Boroom gàngoor yi, ndokkalee ku la wóolu.