Taalifi cant 68

¹Mu jëm ci njiital woykat yi, ñeel Daawuda, di woyu cant. Yàllaay jóg, noonam ya fëlxoo; bañam ña daw, dëddu ko.

²Yàlla wal, ñu naaw ni saxaar. Ñu bon ñi sànku fi kanam Yàlla, mbete dax ak sawara.

³Ñu jub ñi nag bég, di bànneexu fi kanam Yàlla, tey puukarewoo mbégte.

⁴Woyleen Yàlla, teral turam, xàllalleen kiy war niir yi, Ki Sax moo di turam. Bànneexuleen fi kanamam.

⁵Mooy baayoo jirim, di àtte jëtun, kookoo di Yàlla ja fa màkkaanam mu sell.

⁶Yàllaay sàkkal ku wéet wéttal, di afal ku ñu tëjoon, bégal ko, ku déggadi rekk ay dëkke suuf su ne sereŋ.

⁷Céy Yàlla, yaa génn, jiitu sa mbooloo, daagu, dugg màndiŋ ma. Selaw.

⁸Suuf yëngu, asamaan sóob fi kanam Yàlla, boroom tundu Sinayi, Yàllay Israayil ja!

⁹Yàlla, waame nga tawal, leqalee ko réew mi nga séddoo, fa mu sonne,

¹⁰sa mbooloo dëkke fa. Yàlla yaa leel néew-ji-doole ci sag mbaax.

¹¹Boroom beey joxe ndigal, gàngooru jigéen indi xibaar:

¹²«Buur yaak seeni gàngoor a ngay daw a daw, jongomay kër gi di séddale lël ja.

¹³Yeen ñiy waaf ci gétt gi, bésub xare, gànjar a ngi, di laafi pitax yu ñu xoob xaalis, dunq ya teg wurus wuy ray-rayi.»

¹⁴Ba fa Aji Man ji tasaaree buur ya, tawub yuur a ngay sóobe tundu Calmon.

¹⁵Yaw tundu yàlla yi, yaw tundu Basan, tundu Basan, tund wi ci coll yi,

¹⁶looy xeelook say coll, di fiire tund wi Yàlla namma dëkke? Aji Sax ji kat, fa lay dëkk ba fàww!

¹⁷Watiiri xarey Yàlla di ñaar fukki junni (20 000), ba ci junniy junni. Boroom bi ne ca seen biir, di boroom tundu Sinayi fa biir cellte gi.

¹⁸Yaa yéeg fa kaw-a-kaw, jàpp ay jaam, yóbbaale. Yaa nangooy galag ci nit ñi, ba ci ñiy fippu ndax li Yàlla Ki Sax dëkke Siyoŋ.

¹⁹Cant ñeel na Yàlla bésoo bés. Moo nuy jaboote. Yàllaa nuy musal. Selaw.

²⁰Sunu Yàllaa di Yàlla jiy walloo, Aji Sax ji Boroom beey musal bakkan.

²¹Yàlla daal ay rajaxe boppi noonam ak kaaŋ mu sëq mu boroom wéye tooñ.

²²Boroom bi nee: «Basan laay waññee noon yi, waññee leen xóotey géej,

²³ngeen mana xuus ci seen deret, seeni xaj séddu ci seeni néew.»

²⁴Céy Yàlla, gis nañu sa gàngoor di daagu, sama Yàlla, sama buur, sa gàngoor ba ca biir kër gu sell ga.

²⁵Woykat ya jiitu, janq ja topp ca ak tëggum njiin, xalamkat ya mujje.

²⁶Dajeleen, di sant Yàlla, yeen askanu Israayil, santleen Aji Sax ji.

²⁷Giirug Beñamin a ngi jiitu, gën cee néew, njiiti Yuda topp caak seeni kuréel, njiiti Sabulon topp caak njiiti Neftali.

²⁸Yeen, seen Yàlla dogalal na leen kàttan; éy Yàlla, jëfeel doole ja nga nu jëfeeloon.

²⁹Sa kër gi tiim Yerusalem, fa la la buur yiy indiley galag.

³⁰Nanga fa gëdde rabu àll wi ci barax yi, ñooy gétti yëkk yi, xeet yi ci des diy sëllu. Gëdd leen, ba ñu sujjóotalsi laak dogi xaalis. Tasaareel xeet yooyu sopp xare,

³¹ay kàngam bàyyikoo Misra aki galag, réewum Kuus baral loxoom, indil Yàlla.

³²Yeen waa réewi àddina, woyleen Yàlla, teralleen Boroom bi, Selaw.

³³gawar bi ci asamaan, asamaani démb. Ma ngooguy àddu kàddug doole.

³⁴Seedeleen ne doole, fa Yàlla, mi tiime Israayil darajaam, dooleem feeñoo xàmbaar ya.

³⁵Céy Yàllaaka mata ragal fa këram gu sell! Mooy Yàllay Israayil, di may mbooloo mi dooleek kàttan. Cant ñeel na Yàlla!