Taalifi cant 5

¹Mu jëm ci njiital woykat yi, ànd aki toxoro, dib taalifu cant, ñeel Daawuda. Éy Aji Sax ji, maa ngi àddu, déglu ma, maa ngi onk, teewlu ma.

²Sama Buur, sama Yàlla, déglul, ma ne wallóoy! Yaw laay ñaan.

³Aji Sax ji, ag suba, ngay dégg sama baat, suba su ne ma diis la samay dagaan, di séentu.

⁴Doo Yàlla ju safoo coxor, yaw lu bon du la daloo.

⁵Ku réy du taxaw fi sa kanam, kuy def lu ñaaw, bañ nga ko.

⁶Aji Sax ji, yaay sànk kuy fen, seexlu kuy bóomeek kuy wore.

⁷Man nag, sa ngor lu yaa laa saña dugge sa kër, sujjóotal sa béreb bu sell, wormaale la.

⁸Éy Aji Sax ji, wommate ma sa yoonu njub ndaxi noon, te xàllal ma saw yoon.

⁹Ñii, li ñu wax, wérul, seen xol a mébét njekkar, seenug bóli di bàmmeel bu ne ŋàpp, ñuy naxe làmmiñ wu neex.

¹⁰Éy Yàlla, topp leen, ñu fakkastaloo seeni pexe; xalabal ñooñu barey moy, ñoo la gàntal.

¹¹Képp ku la làqoo, yal na bég, di saxoo sarxolle, nga di ko yiir, te ku la sopp di la bége.

¹²Aji Sax ji yaw kat, yaay barkeel ku jub, yiire ko saw yiw, fege ko.