Taalifi cant 49

¹Mu jëm ci njiital woykat yi, dib taalifu cant, ñeel askanu Kore wu góor. Yeen, xeetoo xeet, dégluleen; yeen, waa àddina yépp, teewluleen,

²ngay ku tuut di ku mag, nga bareleek nga néewle.

³Li may wax xel la, di xalaat yu déggu.

⁴Damay teewlu kàddu yu xelu, xalamal la sama tekkiteb cax.

⁵Ana lu may tiit bés yu metti, yu ma njublaŋ yéewe seeni ñaawtéef,

⁶di ñu wóolu seen am-am, di kañoo alal ju bare?

⁷Ana ku mana jot a jot sa bakkanu moroom, mbaa mu di ko feyal Yàlla njot ga?

⁸Njotug bakkan jafe na, bu ci jéem dara.

⁹Ana kuy dund ba fàww, ba doo gis bàmmeel?

¹⁰Xanaa gis ngeen ne xelu, dee; dof, dee; naataxóona it faatu rekk, wacce keneen alalam.

¹¹Sa bàmmeel di sa kër ba fàww, di sa dëkkuwaay bu sax dàkk, boo tudde woon sa bopp ay suuf sax.

¹²Nit ak darajaam fanaanul, mook aw rab a yem, sànku rekk.

¹³Nii la ku wóolu boppam di mujje, mook ku ko topp, di safooy waxam. Selaw.

¹⁴Nara dee rekk niy xar, dee wommat, yóbbu, njub fenk nib jant, ku jub moom leen, njaniiw mëdd seen jëmm, fu sore kërug daraja.

¹⁵Waaye Yàllaa may musal ci dooley njaniiw, jot sama bakkan, ba jël ma. Selaw.

¹⁶Buleen yéemu ci ku barele, teraangay këram di yokku.

¹⁷Du dee ba yóbbaale dara, teraangaam du ko topp biir bàmmeel.

¹⁸Na bége bànneexu bakkanam, ñu di ko kañe koomam,

¹⁹ba tey, day dee, fekkiy maamam, ña dootul gisug leer ba fàww.

²⁰Nit ak darajaam te amul dégg, mook aw rab a yem, sànku rekk.